Хүн хувцас худалдан авахдаа олон минут үзэж сонждог. Тэгвэл хувцаснаас хэдэн мянга дахин үнэтэй байраа худалдан авахдаа гэрээгээ ядаж нэг өдөр судлах хэрэгтэй. Хэдхэн минут гүйлгэж уншаад гэрээ байгуулна гэдэг эрсдэлтэй.

Та борлуулагчид хэлж гэрээгээ авч яваад гэртээ сайн нягталсны дараа нэмэлт зүйл оруулах бол саналаа хэлэх хэрэгтэй юм. Мөн зарим хууль дүрэм, стандартыг сөхөж хараарай. Эрүүл мэнд, хөлс хүчээ бодсон ч байр сонгохдоо сайтар няхуур хандвал танд л ашигтай. Иймд та барилгын чанар стандартыг орхигдуулж болохгүй. Буух эзэн буцах хаягтай байхын тулд хуулиа сайн судлах хэрэгтэй. Ихэнхи компани зарж буй барилгын баталгаат хугацаагаа нэг жилээр заадаг байна. Тэгвэл хуулиар хамгийн багадаа гурван жил байх ёстой аж. Мөн үнээ тодорхой тогтоож, хэдэн давхарын ямар байр авч байгаагаа нарийн тусгавал сайн.

Боломжтой бол тухайн байрынхаа ерөнхий зургийг аваад гэрээнд хавсаргавал тустай. Учир нь анх гэрээнд заасан байрыг нь ашиглалтад орох үед өөр байраар солих тохиолдол гардаг байна. Түүнчлэн, эрүүл мэндэд хоргүй, чанартай хэмээн үзсэн материалаараа байраа бариулахыг гэрээндээ зааж өгч болно. Үүнээс гадна гаднах тохижилт улсаас тогтоосон стандартыг хангасан байх, цонхыг нь таглаж байр барихгүй байх зэрэг нөхцөлүүдийг гэрээнд тусгаж болдог. Хэрэв тухайн компани таны гэрээнд өөрчлөлт оруулах саналыг хүлээж авахгүй бол та заавал гэрээ байгуулах шаардлагагүй. Гэрээ байгуулахдаа ингэж хайхрамжгүй хандаж байгаа юм чинь таны мөнгийг дансандаа оруулсан тохиолдолд яаж аашлах нь ойлгомжтой юм.