Монгол, Беларусийн Засгийн газар хоорондын комиссын  Монголын хэсгийн дарга, Барилга, хот байгуулалтын дэд сайд Г.Байгалмаа  Бүгд Найрамдах Беларусь Улсаас Монгол Улсад суугаа Элчин сайд Эрхэмсэг ноён С.В.Чепурнойг өнөөдөр хүлээн авч уулзлаа. Уулзалтын үеэр талууд хоёр орны хооронд бараа эргэлтийг нэмэгдүүлж, харилцаа, хамтын ажиллагааг зам, тээвэр, барилга, барилгын материал үйлдвэрлэл, үл хөдлөх хөрөнгө, боловсрол, шинжлэх ухаан, хөдөө аж ахуй, аж үйлдвэрийн салбарт эрчимжүүлэх боломжуудын талаар ярилцаж, БНБУ-аас Улаанбаатар хотын нийтийн тээврийн салбарт автобус нийлүүлэх болж байгааг сайшаав. Монголын хэсгийн дарга, дэд сайд Г.Байгалмаа худалдаа, эдийн засаг, шинжлэх ухаан, техникийн хамтын ажиллагааны Монгол, Беларусийн Засгийн газар хоорондын комиссын 2 дугаар хуралдааны протоколыг хэрэгжүүлэх чиглэлээр хийгдэж байгаа зарим ажлуудыг мэдээлж, Улаанбаатар хотноо 2015 онд зохион байгуулагдах 3 дугаар хуралдааны товын талаарх айлын талын саналыг хүлээн авч, бэлтгэл ажлаа хэрэгжүүлэхэд талууд хамтран ажиллана гэдэгт итгэлтэй байгаагаа илэрхийллээ.