Монголбанкны захиалгаар Үл хөдлөх хөрөнгийн “Тэнхлэг зууч” компанийн хараат бусаар хийсэн өнгөрсөн сарын “Орон сууцны үнийн индекс”-ийн (ОСҮИ) судалгааг олон нийтэд танилцууллаа.
Тус судалгаагаар орон сууцны үнийн индекс тайлант сард суурь үе буюу 2013 оны нэгдүгээр сараас 17.3 хувийн өсөлттэй гарчээ. Энэ нь өмнөх сараас -0.5 хувь буурсан үзүүлэлт гэж шинжээчид онцлов. Оны эхэн үетэй харьцуулахад -1.4 хувь буурсан бол, өнгөрсөн оны мөн үетэй буюу 12 сарын өмнөхтэй харьцуулахад мөн -5.06 хувиар буурчээ. Ийнхүү Улаанбаатар хотын орон сууцны үнийн нэгдсэн индекс долоон сар дараалан буурлаа. Түүнчлэн шинэ орон сууцны үнийн индекс суурь үеэс 25.4 хувийн өсөлттэй гарсан нь өмнөх сараас -1.37 хувиар, оны эхэн үеэс -1.08 хувиар буурсан үзүүлэлт аж. Харин өнгөрсөн оны мөн үеэтэй харьцуулбал 0.55 хувийн өсөлт харагдаж байна.
Мөн хуучин орон сууцны үнийн индекс суурь үеэс 12.9 хувийн өсөлттэй гарч, өмнөх сараас -1.3 хувиар буурсан, оны эхэн үеэс -2.78, өнгөрсөн оны мөн үеэс -8.29 хувиар буурчээ.