Ногоон барилгын үзэл баримтлал
Барилгын салбар дэлхийн нийт Дотоодын Нийт Бүтээгдэхүүний 10 хувь, хүлэмжийн хийн ялгаруулалтын 23 хувийг эзэлдэг ба материалын урсгалын 30-40 хувь нь энэ салбарт ногддог гэсэн судалгаа байдаг. Иймд, ногоон барилгын үзэл баримтлалыг хэрэгжүүлэх нь барилга, байгууламжийн байгаль орчин, хүний эрүүл мэндэд нөлөөлөх сөрөг нөлөөг бууруулах, нөөц баялагийг илүү үр ашигтай зарцуулах боломжийг нэмэгдүүлэхэд чухал ач холбогдолтой гэж үздэг.
Үйлдвэржилт, хүний үйл ажиллагаанаас шууд хамааралтайгаар дэлхийн дулаарал хурдацтай явагдаж, үүний улмаас хүмүүний аж амьдрал, байгалийн төрөл зүйлд (байгалийн олон янз) өөрчлөлт орж, экологийн тэнцвэрт байдал алдагдаж байгааг эрдэмтэд төдийгүй дэлхийн Засгийн газрууд хүлээн зөвшөөрсөн.
Ногоон барилгын үзэл баримтлал энэхүү дэлхийн дулаарал хүн төрөлхтөний анхаарлыг татаж эхэлсэн үетэй цаг хугацааны хувьд шууд холбогддог. Ногоон барилга нь барилга барьж эхлэх, түүний ашиглалтанд байх бүхий л хугацааг хамарсан ойлголт бөгөөд хүний эрүүл мэнд, байгаль орчинд ээлтэй байх, нөөцийг үр ашигтай ашигласан байх, барилгын ажлын төлөвлөлт, архитекторын шийдэл хийхээс эхлээд барилгыг барих үйл явц, ашиглаж буй барилгын материал, барилгын дотоод, гадаад орчин зэргийг бүхэлд нь цогцоор нь авч үздэг.
Ногоон барилга нь эдийн засаг, нйигэм, байгаль орчны үнэ цэнийг нэгтгэдгээрээ онцлогтой. Энэхүү нөхцөл, зорилго нь барилгын инженер, архитекторч, зураг төслийн баг, тухайн барилгын төслийн хүрээнд хамтран ажиллах болон хамааралтай талууд нягт хамтран ажиллах шаардлагатай болохыг илтгэн харуулна.
Бидний амьдарч, ажиллах барилга байгууламж эдийн засгийн буюу нөөцийн хувьд үр ашигтай, хэмнэлттэй байх, ашиглах хугацаа харьцангуй урт, тав тухыг хангасан байх нөхцлийг ногоон барилгын үзэл баримтлал чухалчилдаг. Хэдийгээр орчин үеийн шинэ техник, технологи маш олон боломж бололцоо бий болгож буй ч ногоон барилгын үзэл баримлалд голчлон авч үздэг – аливаа барилга байгууламж хүний эрүүл мэнд, байгаль орчинд ээлтэй байх зарчмын хүрээнд дараахи харгалзан үздэг шалгуур нөхцлүүд хэвээр хадгалагдаж ирсэн. Үүнд:
- Эрчим хүч, ус, бусад байгалийн нөөц баялагийг үр ашигтай ашиглах
- Оршин суугчид, ажиллагчдын эрүүл мэндийг хамгаалах, тав тухыг хангаж, бүтээмжийг нэмэгдүүлэх
- Хог хаягдал, орчны бохирдол, байгаль орчинд үзүүлэх сөрөг нөлөөллийг бууруулах зэрэг багтана.
Ногоон барилгын үзэл баримтлал чухлын нэгэн гол шалтгаан нь барилга ногоон байх шаардлагыг хангах нь ногоон эдийн засаг, ногоон хөгжил, цаашилбал, тогтвортой хөгжилтэй шууд холбогддог бөгөөд ногоон хөгжлийн хамгийн гол стратегийн нэг байдагт оршдог. Ногоон барилга нь барилга барих, түүнтэй холбоотой арга барил, техник, ур чадварыг өөртөө багтаасан байдаг тул эрчим хүчний хэрэглээн дэх сэргээгдэх эрчим хүчний эзлэх хувийн жинг нэмэгдүүлэх, эрчим хүч, ус хэмнэх, дулааны алдагдлыг бууруулах, хэмнэлтийн шийдэл бүхий технологи ашиглах, түүний дотор бор, цасны ус болно саарал ус ашиглах шийдэлтэй байх, стандартаар тогтоосон ногоон байгууламжтай байх шаардлагыг хангасан байх, тээврийн хэрэгслийн зогсоолын хангалттай шийдэлтэй байх, ашигласан барилгын материал нь нэгд, хүний эрүүл мэнд, хоёрт, байгаль орчинд сөрөг нөлөө багатай, түүний зэрэгцээ уламжлалт хөнгөн бетон, асфальт хэрэглэхэээс илүүтэй ус нэвчих бетон эсхүл багцалсан хайрга ашигласан байх зэрэг шаардлагыг хангасан байх ёстой байдаг.
Ногоон барилгын талаар цувралаар хүргэх болно.
Ногоон барилгын талаар цувралаар хүргэх болно.