“Монголын эдийн засгийн форум-2015” чуулга уулзалт Төрийн ордонд хоёр өдөр үргэлжилж, өнөөдөр хаалтаа хийлээ. Зургаа дахь жилдээ зохион байгуулагдаж буй энэ удаагийн чуулганд гадаад, дотоодын 1000 орчим төлөөлөгчид  оролцсон бөгөөд нэгдсэн хуралдаанаас гадна үл хөдлөх хөрөнгийн зах зээл, хөрөнгө оруулалт, хууль эрх зүй гэх мэтчилэн олон чухал асуудлын сэдвээр амжилттай зохион байгуулагдаж өндөрлөлөө. 

Энэ удаагийн чуулганы үйл ажиллагааг хааж  УИХ-ын дарга З.Энхболд индэрт үг хэлсэн юм.
Тэрээр хэлсэн үгэндээ: Энэ жилийн эдийн засгийн чуулган маш онлогтой болж байна. Монгол Улсын эдийн засгийн өсөлт саарсан бизнесийн мөчлөгийн хүнд үе, нөгөө талаас Монголын эдийн засгийн урт хугацааны хөгжлийн чиг хандлагыг илүү бодитойгоор харах шаардлага тулгарсан онцгой үе тулгараад байна.



Өнөөгийн эдийн засагт үүссэн хүндрэл нь эдийн засгийнхаа салбаруудын харилцан үйлчлэлийг зөв ойлгох, бодлогын алдаагаа ухаарч, төлөвлөсөн олон ажлаа шамдан хийхийг шаардаж байгааг онцолж, Монголын эдийн засгийн богино хугацааны савлалт, урт хугацааны чиг хандлагыг олон талаас нь хөндөн ярилцсан нь сайшаалтай байгааг дурьдлаа.
Хэдхэн жилийн өмнө манай улсын эдийн засгийн өсөлт 17 хувьд хүрч дэлхийд гайхагдаж байсан цаг саяхан. Харин энэ их өсөлт 3-хан жилийн дотор 7.8 хувь хүртлээ буурсан. Эдийн засгийн өсөлт ингэж хүчтэй саарахад хэд хэдэн хүчин зүйл нөлөөллөө.

Манай улс  шиг хөгжиж буй орны хувьд бизнесийн мөчлөг нь гүнзгий савлагаатай байдаг нь түгээмэл үзэгдэл юм. Монголын эдийн засгийн бас нэг онцлог нь дэд бүтэц, уул уурхайн бус салбарууд харьцангуй сул хөгжсөн байдаг.
Аливаа хөгжингүй улс оронд аж үйлдвэржилтийн суурийг тавих нь улс орны хувьд авч үзвэл хүүхэд эхлээд уншиж, бичиж сурдагтай адил зайлшгүй дамжих ёстой хөгжлийн үе шат юм. Нэмүү өртөг шингэсэн бүтээгдэхүүн үйлдвэрлэж дэлхийн зах зээл дээр өрсөлдөж байж бид үндэсний баялгаа бодитойгоор өсгөж чадна. Ингэснээр манай эдийн засаг илүү тогтвортой болж хурдтай өснө.

Жишээ хэлье. Дэлхийн зэсийн үнэ ганц жилийн дотор 2-3 дахин өсч буурах нь энгийн үзэгдэл байхад зэс ашиглан хийдэг тоног төхөөрөмжийн үнэ бараг өөрчлөгддөггүй гэж хэлж болно. Ямар ч зэсийн нөөцгүй Япон, Солонгос, Тайвань гэсэн 3 улс нийлээд электрон төхөөрөмжийн доторх хэвлэмэл зэс хавтангийн дэлхийн зах зээлийн 40 хувийг үйлдвэрлэж байна. Тэгвэл бид өөрсдийн зэсээ ашиглан энэ харьцангуй энгийн технологи бүхий бүтээгдэхүүнийг үйлдвэрлэн дэлхийн зах зээлийн тэн хагасыг эзэлье гэсэн амбицтай байж яагаад болохгүй гэж.

Өргөн уудам нутагтай хүн ам нь сийрэг тархан суурьшсан манай улсын хувьд дэд бүтцийн зардал их байдаг тул Засгийн газрын зардал ч өндөр байхаас өөр аргагүй. Засгийн газрын орлогод уул уурхайн салбар том жин дарж байгаа. Тиймээс уул уурхайгаас хэт хамааралтай энэхүү бодит байдал ойрын ирээдүйд хүссэн хүсээгүй үргэлжилнэ.

Манай эдийн засагт үүсээд байгаа бас нэг шинэ боломж нь манай хоёр хөрштэй холбоотой. Өнгөрсөн намар Хятадын ерөнхийлөгч Си Зиньпин, Монгол Хятад Оросыг холбосон эдийн засгийн коридор үүсгэх саналыг дэвшүүлсэн. Энэ нь Монгол, Орос, Хятадын хоорондын зам тээврийн уялдааг сайжруулах, ачаа тээвэрлэлтийг хөнгөвчлөх боломж олгоно. Мөн энэ санаачилгын хүрээнд улс дамнасан цахилгаан эрчим хүчний шугам барихыг зорьж байгаа. Энэ шугамыг ашиглан бидэнд Хятад руу эрчим хүч экспортлох боломж бүрдэнэ. Хятадын хотуудын хурдтай хөгжлөөс үүдэн эрчим хүчний эрэлт хэрэгцээ маш хурдтай өсч байгааг бид харж байна.

Хурлын төгөсгөлд хэлэхдээ: Монголын эдийн засаг олон талтай. Энэ бүхнийг бид жилдээ ганц удаа хуралдсанаар дуусахгүй асуудал. Чуулганаар яригдсан асуудлууд болон хөндөж амжаагүй чухал сэдвийг бид тогтмол хэлэлцэж байх болно гэдгээ илрэхийлсэн юм.