Монголын Ногоон барилгын зэрэглэл тогтоох үнэлгээний системийг ногоон барилгын зэрэглэл тогтоодог дэлхий нийтийн туршлага, Монгол улсад мөрдөгддөж буй барилгын норм, стандарт болон Монгол улсын онцлогийг харгалзан үзэхийн зэрэгцээ, Монгол улсын ногоон хөгжлийн бодлогыг хэрэгжүүлэх хүрээнд авч үзэн боловсруулсан болно.

Монголын ногоон барилгын зэрэглэл тогтоох үйл ажиллагаанд энгийн, хялбар, хэрэгжих боломжтой, өөрийн орны онцлогийг харгалзсан, гэхдээ ирээдүйд чиглэсэн зэрэг гол зарчмыг баримтлав.
Монгол улсын Ногоон барилгын зэрэглэл тогтоохын гол зорилго нь эрчим хүч, усны хэмнэлт, нөөц, баялагийг үр ашигтай зарцуулах, орчны бохирдлыг бууруулах нөхцлийг бүрдүүлэх, барилга нь хүний эрүүл мэнд, байгаль орчинд ээлтэй байх, улмаар тогтвортой барилгын салбарыг хөгжүүлэхэд чиглэгдэнэ.

Уг зэрэглэл тогтооход (i) эрчим хүч; (ii) ус; (iii) байгаль орчин (iv) инноваци гэсэн 4 чиглэлийн асуудлыг хамарсан нийт 10 үндсэн, 23 дэд шалгуур үзүүлэлтүүдийг ашиглах, нийт 1000 онооны системтэй байх бөгөөд ногоон барилгын нийт 5 зэрэглэлтэй байна. Нийт шалгуур үзүүлэлтийн 40-49 хувийг хангасан нөхцөлд ногоон барилгын зэрэглэлийн хамгийн доод шаардлага болох нэг одны зэрэглэл, 50-69 хувийг хангасан бол хоёр одны зэрэглэл, 70-79 хувийг хангсан тохиолдолд гурван одны зэрэглэл, 80-89 хувийг хангасан бол дөрвөн одны, 90-ээс дээш хувийг хангасан бол таван одны зэрэглэлийн болзол хангасанд тус тус тооцогдож гэрчилгээ олгогдоно.

Нийт үзүүлэлтэд эзлэх хувийн жингийн тухайд, Монгол улсад тулгамдсанд тооцогддог дулааны алдагдлыг бууруулах, эрчим хүч хэмнэх, Монгол улсын Ногоон хөгжлийн бодлогын сэргээгдэх эрчим хүчний хэрэглээг нэмэгдүүлэх зорилтыг хангах үүднээс сэргээгдэх эрчим хүч хэрэглэх зэрэгт илүүтэй ач холбогдол өгөх нь зүйтэй гэж үзэн нийт 100 онооны 55 оноог эрчим хүчний холбоотой шалгуур үзүүлэлт, 14 оноог усны хэмнэлтийн холбоотой шалгуур үзүүлэлт, 26 оноог байгаль орчны чиглэлийн, үлдсэн 5 оноог инновацийн холбоотой шалгуур үзүүлэлт байхаар тооцсон болно.      
          
Ногоон барилгын зэрэглэл тогтоох үйл ажиллагааны ерөнхий зохион байгуулалт   

Монголын ногоон барилгын зэрэглэл тогтоох үйл ажиллагаа нь мэргэжлийн төрийн бус байгууллага болох Монголын ногоон барилгын хүрээлэнгийн (МНБХ) ажил үүргийн хүрээний асуудал байх ба МНБХ нь үндсэн үйл ажиллагаагаа хэрэгжүүлэхдээ Монгол улсын Байгаль орчин, ногоон хөгжлийн яам, Барилга, хот байгуулалтын яам, түүний харьяа Зураг төсөл, эрдэм шинжилгээний институт, бусад холбогдох төрийн, хувийн, төрийн бус байгууллага, эрдэм шинжилгээний байгууллагуудтай нягт хамтран ажиллана.

МНБХ нь ногоон барилгын зэрэглэл тогтоох шалгуур үзүүлэлтүүдийг хэрхэн хангаж байгаад үнэлгээ хийхдээ, МНБХ-д бүртгэлтэй, ногоон барилгын зэрэглэл тогтоох сургалтанд хамрагдсан, барилгын зураг төслийн, эрчим хүчний аудит, ус болон бохир усны технологийн, барилгын материалын, байгаль орчны хяналтын зэрэг холбогдох салбарын мэргэжилтнүүдээс бүрдсэн баг ажиллуулна.  
 
Ногоон барилгын зэрэглэл тогтоох, гэрчилгээ олгох үйл явц

Ногоон барилгын зэрэглэл тогтоох үйл ажиллагааг Монголын ногоон барилгын хүрээлэн зохион байгуулна. Зэрэглэл тогтоох, гэрчилгээ олгох үйл явц дараахи шатуудаас бүрдэнэ. 

Ногоон барилгын урамшууллын систем

Монгол улсын Ногоон хөгжлийн бодлогын хэрэгжилтийг хангах зорилготой уялдуулан дараахи урамшууллын механизмыг ашиглана*. Үүнд:
Татварын хөнгөлөлт үзүүлэх
Санхүүжилтийн таатай боломж олгох
Төсвийн хөрөнгөөр баригдах шинэ барилгын тухайд дэвшилтэт ногоон технологи ашиглахтай холбоотой нэмэлт зардлыг харгалзан төсөвт тусгаж өгөх
Бусад
Урамшууллын арга хэрэгслийн талаар нарийвчлан тусгасан журам боловсруулах шаардлагатай.