Монгол улсын Ерөнхийлөгч Ц.Элбэгдоржийн санаачлагаар үндэсний үйлдвэрлэгчтэй хийх уулзалт өнөөдөр “Туушин” зочид буудалд болов. Энэхүү уулзалтанд Засгийн газрын гишүүд, яам тамгын газрын ажилтнууд болоод хүнс, хөдөө аж ахуй, хөнгөн үйлдвэрлэл, барилгын салбарын үйлдвэрлэл эрхлэгч 300 гаруй аж ахуйн нэгжийн төлөөлөл оролцлоо. Улс орны эдийн засаг хүндрэлтэй байгаа энэ үед баялгийг бүтээгчидтэй уулзах болсон шалтгаанаа Ерөнхийлөгч ийнхүү тайлбарласан.
Монгол улс гадаадад экспортоор гаргаж байгаа бүтээгдэхүүний 92 хувийг уул уурхайн гаралтай боловсруулалт хийгдээгүй бүтээгдэхүүн эзлэж, үлдсэн наймхан хувь нь цөөн нэр төрлийн бэлэн болсон бүтээгдэхүүн байгаа нь санаа зовох зүйл яахын аргагүй мөн хэмээсэн. Түүнчлэн манай төрийн эдийн засгийн бүтэц сүүлийн 20 гаруй жилийн турш буруу байсан төдийгүй үйлдвэрлэгчдээ дэмжин ажиллах тал дээр маш сул байгаа учир өнөөдөр нүүр нүүрээ харж байгаад өөрийн саналыг хэлж, үйлдвэрлэл эрхлэхийн зовлон зүдгүүрийг амсаж байгаа та бүхнийг саналыг сонсохоор шийдлээ гэж байлаа.

Мөн Ерөнхий сайдад санал болгосны дагуу Аж үйлдвэрийн яамыг шинээр байгуулагдаж байгаад тааламжтай байгаагаа хэлээд үндэсний үйлдвэрлэл эрхлэгчид үйл ажиллагааны чиглэлээр тус тусдаа нэг яаманд харъяалагддаг явдал нь нэгдсэн бодлогод хамрагдаж чадахгүйд хүргэж, салангид байдгаа болих байх хэмээн найдаж байгаагаа шинэхэн яамны шинэхэн сайд Д.Эрдэнэбатад сануулаад авлаа.
Ерөнхийлөгчийн үйлдвэрлэгчдэд хандан хэлсэн үгийн цөм нь “Юм хийж байгаа бол дэлхийн дэвжээнд гар, ингэхэд шаардагдах төр засгийн үйлчилгээ, бодлого шийдвэрийг зохицуулахын төлөө би хичээн ажиллана, харин та бүхэн ажлаа хий, ашгаа ол, татвараа төл”  гэсэн үг байсан юм.
Барилгын салбарынханд хандаж гадаадаас орж ирж буй цементийн татварыг ОХУ 30-35 хувь, БНХАУ 20-25 хувь байлгаж байхад бид дотоодын цементийн хэрэглээгээ хангана гэж ярьж байгаа хэрнээ импортийн цементийг татваргүй шахам оруулж байгааг би харж байгаа хэмээсэн. Түүнчлэн энд цугласан үйлдвэрлэгчдэд зориулж одоо бүгдээрээ нэг ч болов гадаад үгийг халцгаая цемент гэдэг үгийг гахиур хэмээн нэрлэвэл ямар болох талаар өөрийн саналыг хэлсэн. Уулзалтанд оролцогсод бүгд шахам бичиж авна билээ. Магад үүнээс хойш цемент гэх нэршил гахиур болж хувирах ч юм билүү.
Ерөнхийлөгч үг хэлж дууссаны дараа үйлдвэрлэгчдийн саналыг сонссон.

Саналаа хэлэх хүмүүс дэндүү олон байсан учир багагүй дараалал үүссэн ч үйлдвэрлэгчид  өөрсдийн саналыг улсынхаа тэргүүнд хүргэж чадсан, үр дүнтэй уулзалт болсон юм. Хэдийгээр өөр салбарт үйлдвэрлэл эрхлэж байгаа ч нэгтгэх “зовлон” байгаа нь энэхүү уулзалтаас анзаарагдсан. Тухайлбал банкны зээлийн хүү хэтэрхий өндөр байгаа, татварын дарамт, тусгай зөвшөөрлийг хөнгөвчилж өгөх тухай санал нэлээд хэдэн удаа давтагдав. Мөн яам байгуулснаар баялгийг бүтээдэггүй, үйлдвэр байгуулснаар баялгийг бүтээдэг хэмээн шүүмж илгээх хүмүүс ч байлаа. Мөн та “Ерөнхийлөгч болсноос хойш манай хүнсний үйлдвэрлэлээс нэг ч хүн шагнал авсангүй. Биднийг яагаад орхиод байгаа юм” хэмээн гомдол гаргагчид ч байсан юм.