Монгол улсын Засгийн газрын үйл ажиллагааны мөрийн хөтөлбөрт иргэний агаарын тээврийн хөгжлийг эрчимжүүлж, Төв аймгийн Хөшигийн хөндийд олон улсын нисэх буудал байгуулж, Улаанбаатар хотын дэд бүтцэд холбоно гэсэн зорилтын хүрээнд хэрэгжиж буй “NUBIA “олон улсын төслийн ажилтай газар дээр нь очиж танилцав. Энэхүү төсөлд дэлхийн шилдэг компаниудаас гадна Монголын барилгын компаниуд мөр зэрэгцэн, мэдлэг ур чадвараараа дутахааргүй ажиллаж байгаа нь бахархууштай юм. Ингээд NUBIA олон улсын төсөл дээр ажиллаж буй “Бүти” ХХК-ийн  менежер Г.Баясгалантай ярилцсанаа хүргэе.







                                                                     Зочин Г.Баясгалан

    Монгол улсад хэрэгжиж буй томоохон бүтээн байгуулалтын нэг болох олон улсын шинэ нисэх буудлын NUBIA төслийн талаар танилцуулахгүй юу?

Улаанбаатар хотын ойролцоо Төв аймгийн Сэргэлэн сумын нутаг Хөшигийн хөндийд олон улсын шинэ нисэх онгоцны буудал барих төслийг Японы Олон улсын хамтын ажиллагааны байгууллага (ЖАЙКА)-тай нэгдсэнээр ЖАЙКА нэрийн дор төсөл хэрэгжиж байна. Уг төслийн ажил нь 2013 оны 6 сард төсөл зарлагдсанаар, манай компани шалгарч туслан гүйцэтгэгч болж төмөр бетон хийцлэлээр 8 сарын 01 нээс ажилаа эхэлж, өнөөдрийн байдлаар 1 жил нэг сарын хугацаанд 14000 орчим куб метр бетоны ажил, 2600 орчим арматурчлалын ажил хийж 80 орчим хувь нь бэлэн болоод байна.

Энэ жил зорчигчдын терминалын суурь, зоорийн давхар, нэгдүгээр давхрын төмөр бетон бүтээцийн ажлыг хийж гүйцэтгэхээр төлөвлөсан бөгөөд уг ажлыг аравдугаар сарын 30 хүртэлх хугацаанд гүйцэтгэх юм. Шинэ нисэх буудлын зурвас нь 3600х45 метр хэмжээтэй байх ба хоёр талаасаа онгоц хөөрч, буух боломжтой. Мөн зорчигч үйлчилгээний терминал нь нэг цагт 1100 зорчигчид үйлчлэх хүчин чадалтай байна. Эхний ээлжинд онгоц хүлээн авах 6 хүзүүвчтэй байна. Иж бүрэн барилга байгууламжаас бүрдсэн олон улсын  шинэ нисэх буудлыг 2018 он гэхэд ашиглалтад хүлээн авахаар тооцож байгаа бөгөөд 2019 он гэхэд жилдээ олон улсын болон дотоодын нислэгээр 1 сая 650 мянган зорчигчдод үйлчилж, 11900 тн ачаа тээвэрлэдэг болохоор тооцоолж байна. 

    Дэлхийн шилдэг барилгын компаниудтай мөр зэрэгцэн ажиллаж байх мөчид, хөдөлмөрийн аюулгүй ажиллагааны стандарт хэрхэн мөрдөгдөж байна вэ?

Хөдөлмөрийн аюулгүй ажиллагааг Америкчууд олон улсын стандартын дагуу хяналт тавин ажиллаж байна. Манай ажилчид ч бас үүнээс практик дээр суралцах зүйл маш олон байна. Цаашдаа хөдөлмөрийн аюулгүй ажиллагааг өөрийн компанидаа олон улсын жишгээр нэвтрүүлэх нь барилгын талбарт осол аваарь гарах явц багасах юм. Жишээбэл хөдөлмөрийн аюулгүй ажиллагааг хангах бүхэл бүтэн 20 хүний бүрэлдэхүүнтэй баг ажиллаж байна. Эдгээр багийн ажилчид маань барилгын талбарт нэг ширхэг хадаас ч газарт хаягдах ёсгүй, дээрээс юм унахаас хамгаалж  давхар давхар торон хамгаалалт гээд маш өндөр хамгаалалтын бүсэд бид ажиллаж байгаа учираас айх аюулгүй ажлаа хийдэг.

    Энэхүү төсөл дээр  гадны хичнээн компани ажиллаж байна. Мөн Монголд нэвтрээгүй  дэвшилтэт техник технологиуд хэрхэн нэвтэрч байна вэ?

Дэлхийн томоохон компаниуд болох “Oriental Consultants” Co., Ltd, “Mitsubishi corporation”,  “Chiyoda corporation”,  “Samsung C&T”,  “Azusa Sekkei” Co., Ltd зэрэг дэлхийн шилдэг компаниуд манай улсын бүтээн байгуулалтанд оролцож, тэр тусмаа Монгол ажилчид мөр зэрэгцэн ажиллаж байгаа нь бид бүхний хувьд аз завшаан юм. Техник технологийн хувьд бид хамгийн чанартай Монголд нэвтрээгүй технологиудыг ашиглаж байна.

“Samsung корпораци” төслийн ерөнхий туслан гүйцэтгэгчээр ажиллаж байна. Энэхүү төсөлд Монгол гадаадын нийлсэн 17-21 орчим туслан гүйцэтгэгч компаниуд ажиллаж байгаа юм. Дэвшилтэт технологиудын хувьд  цухас дурьдвал Японы “JFE Egnineering” компани 5 метрийн өндөртэй нийт 200 орчим багана угсрах юм.

Мөн аэродромын хөөрч буух зурвасын бетон хучилтын ажлыг Герман улсад үйлдвэрлэсэн “Вертген” гэдэг нэртэй бетон зам тавихад ашигладаг гайхалтай технологийн автомат машинаар 3600 метрийн урттай, 45 метрийн өргөнтэй, 7.5 метрийн асфальто бетон хөвөөг хоёр талаар нь дэвсэх юм. Энэ технологийг Монгол улсад анх удаа аэродром барихад ашиглаж байгаараа онцлогтой юм.

   -Ийм алслагдмал бүсэд дэд бүтцийн асуудлаа хэрхэн шийдэж байна. Зөвхөн гадны санхүүжилтээс гадна манайхан өөрийн хөрөнгөөр хийж байгаа бүтээн байгуулалт бий юу?

-Монгол Улсын Засгийн газар доорх барилга байгууламжийг өөрийн хөрөнгөөр  хариуцан барьж байгуулж байгаа Үүнд:

Дэд бүтцийн хувьд цахилгааны асуудлаа бүрэн шийдсэн төдийгүй Төвийн эрчим хүчнээс, Сэргэлэн сумын салхин хөдөлгүүрээс гэсэн 2 эх үүсвэрээс цахилгааны асуудал болоод дэд бүтцийн асуудлаа шийдэж байна.

     -Төсөл эхэлснээс хойш ажлын явц хэдэн хувьтай явагдаж байна. Мөн манай Монгол ажилчид гадны ажилчдаас ур чадварын хувьд хэр зөрүүтэй байна вэ?

-Нийт ажлын явц 18,5 хувьтай явж байна. Тухайн төслийн хүрээнд 30 гаруй объект баригдах юм. Одоогийн байдлаар үндсэн том объектууд баригдаж эхлээд байна. Жишээлбэл: Томоохон бүтээн байгуулалтууд болох Зорчигч үйлчилгээний барилга, Нислэг хөдөлгөөний удирдлагын цамхаг, Гал унтраах,авран хамгаалах албаны барилга, Хяналтын цамхагийн цахилгааны дэд өртөө, Цахилгааны үндсэн дэд өртөөний барилга, Ачаа,шуудан тээврийн үйлчилгээний барилга, Онгоц хөөрч, буух зурвас, Авто машины зогсоол /825 машины зогсоол/ гэх мэт томоохон объектууд баригдаж байна.

Манай ажилчид мэдлэг, ур чадварын хувьд гадныхнаас дутахгүй ажлаа түргэн шуурхай, хариуцлагатай, чанартай хийж гүйцэтгэж байгаа. Харин тулгамдаж байгаа гол асуудал гэвэл олон улсын баг хамтарсан төсөлд ажиллахад гадаад хэлний бэрхшээл тулгарч, заавал инженерүүд нь дэргэдээ орчуулагч авч явах шаардлагатай болж байна. Цаашид Монгол улсад олон улсын хамтарсан томоохон төслүүд ар араасаа хэрэгжих тул барилгын салбарын гол чиглүүлэгч болсон инженерүүд маань гадаад хэлтэй байх шаардлага тулгарч байна.

     -Гадаад ажилчдаас олж харсан давуу тал  гэвэл та юуг нэрлэх вэ?

 -Гадаадын ажилчдын давуу тал нь цагийг 100% бүрэн ашиглаж чаддаг төдийгүй тухайн ажилчнаас ямар бүтээмж гарах боломжтойг нарийн тооцоолж, тухайн өдрийн орой нь ажлаа дүгнээд явчихаар бүтээмж маш их гарч тэр хирээр цагтай уралдаж ажилладаг давуу талтай нь ажиглагдсан.

Манай ажилчдын хувьд мөн адил олон улсын системийн дагуу ажил явагдаж байна. Харин бид ажлын бүтээмжийг өндөрсгөх зорилгоор нэг зүйл санаачилсан нь үр дүнгээ өгч байгаа. Угсралт хариуцаж буй бригадын дарга Батсүхийн санаачлагаар 10-тын систем гэж нэвтрүүлсэн. Энэ нь олон хүнтэй харьцаж цаг гарздахгүйгээр зөвхөн тухайн 10-н хүнийг хариуцан ажилладаг 10-тын дарга болох инженертэй л ажлын үр дүн бүтээмжийг дүгнэн харилцах болно. Ингэснээр тухайн 10 хүнтэй баг ажил үүргээ төлөвлөгөө тооцоотой хийж, нэг баг болон ажиллах нь үр дүнгээ хурдан өгч бид графикийхаа дагуу ажлаа шуурхай гүйцэтгэхэд маш зөв алхам болж чадаж байна. Энэ санаачлагыг манай бусад төслийн багийхан ч хэрэгжүүлээд үр дүнгээ өгөөд явж байна.

   -Хамтран ажиллаж байгаа гадны компаниуд Монгол ажилчдыг хэрхэн үнэлж байна. Цаашид манай ажилчид гадныхантай томоохон төслүүдэд ажиллах боломж харагдаж байна уу?

-Манайхан энэхүү төслийн дааж авсан ажлаа яг графикийн дагуу ажиллаад хүлээлгээд өгвөл бид гадны компаниудаас өндөр үнэлгээ аваад үнэлэгдээд ирнэ. Гадны компаниуд анх манайхныг чадах эсэхэд их эргэлзэж байсан гэдэг. Анх бид 9680 дахь метр куб бетоноо аваад дуусгаж байхад “Samsung” төслийн менежер ирж манай баг хамт олонд баяр хүргэж байсан. Олон улсын төслийн багт үнэлэгдэнэ гэдэг яухал. Цаашид бид гадны зах зээлд төдийгүй дотоодын бүтээн байгуулалтанд оролцох өөрсдийн ажилчдаа илүү чадварлаг мэргэшүүлж өгөх хэрэгтэй юм. Өглөө биднийг 6 цагт ажлын талбай дээрээ дасгал хийхээр очиход Солонгос ажилчид бидэнд хүндэтгэл үзүүлж, харилцан бие биетэйгээ ёслон ажилдаа орцгоодог. Энэ нь бид нэг баг болон ажиллаж байгаагийн хувьд харилцан бие биедээ хүндэтгэл үзүүлж, бие биенээ хүндлэх, ойлголцох зэргээр ажилчид хоорондоо эвсэг байдаг нь ажил сайн явагдахад нөлөөлж чаддаг.

   -Манай улсын хувьд барилгын салбар улирлын хамааралтай явагддаг. Төслийн ажил өвөл үйл ажиллагаагаа явуулах боломжтой юу?

-Энэ жилийн хувьд манай орон барилгын салбар нь улирлын хамааралтай болохоор бид 11 сарын 01-н хүртэл ажилчид энэ оныхоо төслийн эхний ажлын гүйцэтгэл дуусна.

    -Таны хувьд барилгын салбарын хамгийн сайхан зүйл юу вэ?

-Барилгын салбарт ажиллахад тухайн хүн өөрийхөө гар бие оролцсон бүтээн байгуулалтаа барьж дуусгаад улсын комисс хянаж шалгаад ямарч асуудалгүй хүлээж авах мөч хамгийн сайхан урамтай санагддаг даа. Эргээд харахад бүтээн босгосон барилга бүхэн минь түүх өгүүлж байдаг нь харахад бахархах сэтгэл төрдөг.

     Ярилцлага өгч бүтээн байгуулалтын ажилтайгаа танилцуулсан танд маш их баярлалаа. Та бүхний бүтээн байгуулах ажил үйлст өндрөөс өндөр амжилт хүсье. Баярлалаа.

-Маш их баярлалаа зорьж ирэн бидний ажилтай танилцсанд, барилгын салбарыг үргэлж дэмжиж байдаг танай хамт олонд ажлын амжилт хүсье. 

   Ярилцсан: А. Отгончимэг



                 Бригадын дарга Ё. Батсүхийн хамт







             Бохир ус цэвэрлэх байгууламж



        Гал унтраах авран хамгаалах албаны барилга   



     Зорчигч үйлчилгээний төв барилга



          Зорчигч үйлчилгээний төв барилга



      Замын ажил







            Зорчигчид орох гарах гарц



           Зорчих чиглэл



      Нислэгийн хөдөлгөөний удирдлагын цамхаг



















          Зорчигч үйлчилгээний төв барилга 



             Шинэ нисэх буудал маань ийм болох нь