Монголын архитектурийн эвлэл /МАЭ/-ээс  хамтын ажиллагаатай гадаадын байгууллагуудаас мэргэжлийн архитекторуудыг урин авчирч мэдээлэл солилцох, туршлага хуваалцах үйл ажиллагааг тогтмол зохион байгуулдаг. Ийм нэгэн арга хэмжээг өчигдөр өөрийн байрандаа зохиосон бөгөөд архитектурын чиглэлээр үйл ажиллагаа явуулдаг, энэ мэргэжлээр суралцдаг, сонирхон судалдаг бүхий л хүмүүсийн дунд нээлттэй болсон юм. Энэ удаагийн лекцийн эзэн  БНСУ-ын иргэн  Азийн архитектур дизайны дэд ерөнхийлөгч байсан бөгөөд тэрбээр өөрийн судлагааны ажил болоод Монголын архитектурын хөгжлийн талаар санал бодлоо чөлөөтэй хуваалцсан юм.
      Түүний илтгэлд хамгийн сонирхолтой санагдсан тоо баримтаас хуваалцвал: Сүүлийн хэдэн жилд дэлхий дахинд баригдаж байгаа нийт барилга бүтээн байгуулалтын  70 орчим хувь Азид өрнөж байгаа ч тэдгээр барилгын архитектур зураг төслийн 70 орчим хувийг Европ архитекторууд гаргаж байгаа гэнэ. Өөрөөр хэлбэл Азийнхан энэ чиглэлд буурал тивийнхэнээс хоцорч яваа юм байна.
      Харин Монгол өвөрмөц хийцлэл бүхий барилга байгууламж бараг байхгүй байгаа нь олон улсад  structure design хэмээн нэршсэн хөрвүүлвэл хийцлэлийн архитектур чиглэлийн мэргэжилтэн дутмаг байгаагаас үүдэлтэй хэмээн дүгнэсэн. Мэдээж энэ дүгнэлттэй санал нийлэх эсэх нь мөн эрхэм уншигчийн сонголт билээ. МАЭ цаашид ч ийм төрлийн лекцийг зохион байгуулах гэнэ.