Данийн нийслэл Копенгагенд дэлхийн шилдэг оюутны байр гэж хэлж болох нэгэн барилга бий. Копенгагены төвөөс холгүйхэн байрлах 6 давхар 360 өрөө бүхий энэ барилга тус улсын Бизнесийн дээд сургуулийн оюутнуудад зориулан барьсан дотуур байр юм. Өрөөний тоо 360 байгаа нь энэ барилга 360 градус буюу тойрог хэлбэртэйгээс үүдэлтэй гэнэ. Харин яагаад шилдэг оюутны  байр тэр тусмаа дэлхийн дахинд үнэлэгдэх болсон гэвэл уг барилга нь архитектурын гайхалтай бүтээл төдийгүй доторх зохион байгуулалт цэвэр үзэмжтэй байдал зэрэг нь олон хүн хамтдаа амьдардаг гэж хэлэхэд итгэмээргүй гэнэ.




       Хоол хийх гал тогоо, угаалгын  өрөө, оюутны номын сан, спорт танхим зэрэг нь бүгд хамгийн сүүлийн үеийн тоноглолуудтай төдийгүй бүгд олон хүн хамтдаа байсан ч бусдад төдийлөн саад болохгүйгээр зохион байгуулсан нь гайхалтай.




Түүнчлэн барилга өөрөө дугуй хэлбэртэй учир доторх сул орон зайг цэцэрлэгт хүрээлэн болгосон нь  хотын хөдөлгөөнд дунд амьдарч байгаа мэт сэтгэгдэлийг үгүй болгодог байна.


Мөн үдэш болоход барилгын гаднах гэрэлтүүлэг орчин тойрондоо гоёмсог гэрэл цацруулахаас гадна барилгын цахилгаан шат болоод яван шатны орчмыг шилээр хийсэн учир эдгээрээс гарах гэрэл бас нэгэн гайхамшиг мэт харагддаг гэнэ.


Зөвхөн энэ дотуур байранд амьдрахын тулд уг сургуулийг сонгосон тохиолдол оюутнуудын дунд цөөнгүй байсан нь уг дотуур байр ямархуу төвшинд байгааг илтгэнэ.
Манайд их сургуулиудын хотхоныг Багануур дүүрэгт байгуулахаар зураг төсөл нь батлагдсан өнөө үед доторх засал, бусад зүйлсээс санаа авч болохоор санагдав.