Энэ асуултын хариуг “Нүүдлийн хотоос суурин хот” үзэсгэлэн үзсэнээр мэдэж болох нь. Эсгий хотоос нүүдлийн хот хүртэлх түүхийг харуулсан нэгэн үзэсгэлэн Үндэсний музейд нээгдээд 3 хонож байна. Улаанбаатар хотын 375 жилийн ойд зориулж нийслэлийн Засаг даргын тамгын газраас санаачлан Архивын газартай хамтран зохион байгуулсан энэхүү үзэсгэлэнд 1639-2014 он хүртэлх нийслэлийн түүхэнд холбогдох нэн үнэт 20 гаруй уран зураг, газрын зураг, 240 гаруй гэрэл зураг, Өргөө, Нийслэл хүрээ, Улаанбаатар хотын түүхэнд холбогдох 30 гаруй зарлиг, тогтоол, шийдвэр мөн баримтат  кино,  40 гаруй бусад баримтыг дижитал хэлбэрээр үзүүлэх  50 гаруй үзмэрийг олон нийтэд ямар ч үнэ төлбөргүйгээр дэлгэн харуулж байгаа юм. Өөрөөр хэлбэл олон нийтэд төдийлөн дэлгэн харуулдаггүй түүхийн нэн үнэт бүтээлийг энэ үзэсгэлэнг үзсэнээр харж чадах юм. Түүнчлэн нийслэлийн үе үеийн бүтээн байгуулалтыг фото зургийн дуранд бууснаар харж болно.


Нийслэлийн түүхийн үнэгүй хичээл ч гэж хэлж болмоор. Ерөнхий боловсролын сурагчид анги хамт олноороо зохион байгуулалттай үзэж байна. 4-5 настай цэцэрлэгийн жаалууд ч дүүрэн. Хөдөөнөөс ирээд Чингисийн талбай дээр зургаа даруулах гэж яваад зар хараад ирсэн өвөө ч явж байв.


Ер нь л нэг байшин барилгагүй, эсгий хот хэмээн яригдаж байсан нийслэл хот маань хэрхэн барилгажсан, түүнд хэн ямар үүрэгтэй оролцсон, анх гудамж талбайгаа хэрхэн хаягжуулж байсан, газар өмчлөл, төлөвлөлтийг хэрхэн хийж байсан зэрэг олон сонирхолтой зүйлсийг энэ үзэсгэлэнгээс мэдэж болно.



Социолист нийгмийн үеийн бүтээн байгуулалтыг ведио бичлэгээр үзүүлэх учир үзэсгэлэнг үзэхээр ирсэн хүүхдүүд төдийгүй насанд хүрэгчдэд маш ойлгомжтой болжээ. Тэр үеийн хүмүүсийн хувцаслалтаас эхлээд бүхий л зүйл хүүхдүүдэд ихэд сонин байгаа бололтой биесийг нэрээр дуудан харуулна. Харин настай хүмүүс түүхийн тэр үед очиж,  яг л ийм байсан тухай дурсана. Ийм нэг үзэсгэлэн Үндэсний музейд 7 хоногийн турш дэлгэгдэнэ. Та ч бас үзээрэй.