Барилгын салбарт өрнөж буй бүхий л мэдээ мэдээлэл, үйл явдлыг цаг алдалгүй хүргэж байдаг сар тутмын “Барилга.МН” сэтгүүл шинэхэн дугаараа уншигч таны гар дээр өргөн барьж байна.

 Бид энэ удаагийн дугаартаа цахим ертөнцөд хэдийнэ олны танил болж, үл хөдлөх хөрөнгийн бизнесийн салбарт амжилттай ажиллаж байгаа залуухан бизнес эрхлэгч эмэгтэй А.Урангоог “Зочин” буландаа урин ярилцлаа. “Бурхан, боломж хоёул зэрэгцэн ирээд миний ирээдүйг гэрэлтүүлнэ гээд зүгээр суудаг хүн би биш”  гарчиг бүхий түүний ярилцлага уншигч танд илүү ихийг хийж бүтээх шинэ санаа, урам өгнө гэдэгт итгэлтэй байна.

Түүнчлэн “Үйлдвэрийн сурвалжлага” буландаа  “Монгол базальт” ХХК сонгон авч сурвалжилсан бөгөөд өөрийн орны эрдэс түүхий эдийг түшиглэн байгуулсан үйлдвэр нь ямар үр өгөөжтэй, ямар ашигтай бизнес болохыг сануулж, энэ төрлийн үйлдвэрийг хэрхэн байгуулж болох гарцийг зааж өгөхийг хичээлээ.


“Хууль эрх зүй” буланд барилга барихад бүрдүүлэх эрх зүйн баримт бичгүүдийг хэрхэн, хаанаас бүрдүүлэхийг нэгтгэн харуулсан нь барилгын салбарынханд нэн хэрэгцээт мэдээлэл болсон гэж найдаж байна. Хөдөлмөр хамгааллын талаар амтай бүхэн ярьсан өнгөрсөн 10-р сард бид зөвхөн осол аваарыг халаглан тоочих бус хөдөлмөр хамгаалал юунаас хамаарч, хаана алдагдаж байгаад л анхаарал хандуулахыг эрмэлзлээ. Энэ тухай “Хөдөлмөр хамгаалал гэж хүн бүхэн хашгирахад...” гарчигаас уншиж танилцаарай.



         "Ойрын танилаас холын зочин сонин" гэдэгчлэн сүүлийн үед барилга архитектур, интерьер дизайны салбарт дэлхий дахинд нэр нь цууриатах болсон эмэгтэй архитектор Заха Хадидын намтар болоод уран бүтээлийн талаар уншигч тантай хуваалцахаар зэхлээ. 



Мөн өмнөд хөршид саяхан баригдсан бага сургуулийн барилга эрхгүй анхаарал татаж, манайхан ч бас зай талбайг зөв ашигласан барилга олныг барьж байгуулаасай хэмээн хүсч дээвэр дээрээ гүйлтийн зам, сагсны талбай бүхий сургуулийн барилгын танилцуулгыг багтаасан болно.

Энэ удаагийн дугаарт сонирхол татахуйц бас нэгэн ярилцлага багтсан нь “Барилгын салбарт тоглоомын дүрэм өөрчлөгдөж байгааг зах зээлийн судлагаанууд харуулж байна” гэсэн гарчигийн дор буй. Уншигч танд лавтайяа таалагдах биз ээ. 


Мөн бид уншигчдын маань мөнхийн асуулт болох үл хөдлөх хөрөнгө, орон сууцны үнэ буурах эсэх талаар холбогдох судалгааны байгууллагуудаас тодруулсан хамгийн сүүлийн үеийн мэдээллийг нийтэлсэн байгаа. Иймээс орон сууцны үнэ буурах эсэх талаар энэ хэсгээс мэдэж болох юм.

Мэдээж барилгын ажил гүйцэтгэлийн дундаж үнэ ханш болоод барилгын материалын үндсэн нэрийн бүтээгдэхүүний хамгийн сүүлийн үнийн мэдээллийг багтаасанаас гадна нийслэл хотод баригдаж байгаа шинэ орон сууцны үнэ ханшийн яг одоогийн мэдээллийг ч уламжлал ёсоор сэтгүүлийн арын хуудсуудад нийтлэв.

Энэ мэтчилэн шинэ сэтгүүлд маань олон сонирхолтой, уншвартай зүйлс багтсанаас товчлон дурдахад ийм бөгөөд илүү  сонирхолтой мэдээллийг сэтгүүлээ худалдан авч танилцсанаар мэдэх юм. 

             Таныг цаашид ч манай сэтгүүлийн байнгын уншигч байна гэдэгт итгэж байна.