Хэдхэн жилийн өмнө дэлхийн хамгийн өндөр барилгад тооцогдож байсан Арабын Дубай хотын “Бурж Дубай” хэмээх 828 метр өндөр тэнгэр баганадсан байгууламж өдгөө байр сууриа тавьж өгөх цаг нь ирсэн бололтой. Энэхүү барилгаас даруй 10 метр өндөр барилгыг БНХАУ-ын Чанши хотод Сянзяна мөрний эрэг дээр барихаар төлөвлөж байгаа бөгөөд “Тэнгэрийн хот”  буюу Sky City гэж нэрлэжээ.
Энэ төсөл дээр “Бурж Дубай”-г босгосон инженерүүд ажиллаж байгаа ба гүйцэтгэгч нь Хятадын “Broad Group” компани аж.  Уг группын барилгачид 15 хоногийн дотор 30 давхар зочид буудал барьж, дээд амжилт тогтоож байсан учир “Тэнгэрийн хот”ыг энэ жилдээ багтааж барина хэмээн төлөвлөж байгаа гэнэ. 


Нийт барилгын 83 хувийг орон сууц, бусад нь офис, сургууль, дэлгүүр, эмнэлэг болон зоогийн газруудад зориулагдана.
Энэ босоо хотод 31400 хүн оршин сууж, ажиллах боломжтой бөгөөд тэдгээрийн хэрэгцээнд өндөр хурдны 104 өргөгч шат буюу лифт байх гэнэ. 
Түүнчлэн “Тэнгэрийн хот” өртгийг хамгийн их хэмнэх буюу нэг хавтгай дөрвөлжин метр талбайг барьж байгуулахад ердөө 150 000 доллар буюу Дубайн барилгаас 10 дахин хямд зардалаар барихаар төлөвлөжээ.  Хамгийн чухал нь, энэ барилга газар хөдлөлтийн 9 баллын чичиргээг түвэггүй давах чадвартай аж.