Байгаль дэлхий ногоон нөмрөгөө тайлж, шаргал намар айлчлан ирэхэд хүн бүрийн сэтгэл гэгэлзэж хөнгөн гунигт автдаг билээ. Хүмүүн бид урлагийн төгс бүтээл болох байгалийн сайхнаас сэтгэлийн асар их таашаал авч амьдардаг.

Иймээс та бүхэнд гэртээ үзэсгэлэнт намрын уур амьсгал бүрдүүлж, байгаль эхтэйгээ илүү ойр байгаа мэт мэдрэмж төрүүлэхүйц “бүтээлч” санаануудыг танилцуулж байна.

          Намрын ойг санагдуулам ширээний бүтээлэг

Энэ улирлын хамгийн үзэсгэлэнтэй нь “намрын ой” билээ. Гэртээ ч яг л тэр үзэсгэлэнт орчинд очсон мэт сэтгэгдэлтэй байхыг хүсвэл намрын өнгө аясыг илтгэх шарласан навч, моддын зурагтай бүтээлгээр ширээгээ чимэглэж болох юм.

                                                                Шилэн хоргон дахь намар

Төрөл бүрийн шилэн хоргон дотор шарласан навч, өвс зэргийг ашиглан намрыг санагдуулахуйц байгалийн бүтээл урлаж гэрийнхээ аль нэг хэсэгт тавих юмуу өлгөснөөр үлгэрийн мэт сайхан орчин бүрдүүлэх боломжтой.



                                                                     Навчин чимэглэлүүд

Намрын навч нь хамгийн хямд төсөр, гар доорх материал бөгөөд үүгээр маш олон төрлийн чимэглэл хийж болдог. Тухайлбал ханын чимэглэл, цонхны зүүлт, жаазтай зураг, бяцхан мод, хаалганы чимэглэл гэх мэт. Намарт дурлагсад өөрийн хүссэнээр гэрээ “жинхэнэ намар” болгон тохижуулах шилдэг арга бол энэ юм.



                                                  Намуун, дулаахан мэдрэмж өгөх гэрэлт дэнлүү

Айл гэрт халуун дулаан уур амьсгал мэдрүүлдэг чухал зүйлсийн нэг бол гэрлэн чимэглэл буюу лаа, дэнлүү билээ. Гэртээ намрын өнгөтэй лааг чимэглэж тавихаас гадна гоёмсог хорготой дэнлүү хийж намуун бөгөөд дулаахан орчин бүрдүүлээрэй.





                                             Зочдын өрөөнд намар авчрах гоёмсог дэрнүүд

Зочны өрөөндөө намрын өнгө аяс оруулахын тулд буйдан, зөөлөн сандал дээрх дэрнүүдийг өөрчлөх арга бий. Дэрэн дээр намрын байгалийг илэрхийлэхүйц хатгамал оёх зэргээр чимэглэснээр өрөөний уур амьсгал мэдэгдэхүйц өөрчлөгдөх болно.



                                                                Алтан шаргал шилэн эдлэлүүд

Гэрийн өнгө үзэмжийг нэмэх гоёлын шилэн хундага, ваар зэргийг алтлаг өнгийн будгаар бүрэх нь маш бүтээлч санаачлага болж чадна. Ингэснээр гэр тань урлагийн мэдрэмж бүхий харагдахаас гадна “алтан намар”-аар амьсгалж эхлэх юм.



                                                        Номын тавиур дээрээ намрыг залцгаая.

Номын тавиураа улбар өнгөөр будах, дээр нь байгалийн гоёл өрөх зэргээр намар мэт болгох нь танд таатай санагдаж магадгүй. Учир нь уг бүтээл таны дотоод ертөнцийн мэдрэмж, хүсэл, ур чадварын тусгал болох нь дамжиггүй.