Өвөрхангай аймгийн ГХБХБГ-ын ажлын байр, лабораторийн барилгын нээлтийн ёслол саяхан боллоо. Нээлтэд БХБЯ-ны удирдлагууд болон  аймгийн ИТХ-ын дарга, аймгийн Засаг дарга, ГХГЗЗГазар, Барилгын хөгжлийн төвийн Захиргааны хэлтсийн дарга Ч.Оюунсүрэн, Магадлалын хэлтсийн ахлах мэргэжилтэн Л.Баярсайхан, Барилга, барилгын материалын хэлтсийн мэргэжилтэн Н.Батжаргал нарын албаны хүмүүс оролцсон байна. 
БХБЯ-ны 811 сая төгрөгийн хөрөнгө оруулалтаар барьсан энэхүү барилгыг  Улаанбаатар хотын “Мон хурд” ХХК-ийн хамт олон өнгөрсөн оны есдүгээр сарын 15-наас энэ оны наймдугаар сарын 15-ны хооронд  гүйцэтгэжээ.
Барилгад ашиглаж байгаа материал, түүхий эдийг чанар стандартын шаардлага хангах, хяналт шинжилгээ хийж дүгнэлт гаргахад энэхүү лаборатори чухал үүрэг гүйцэтгэх юм. Уг лаборатори бетоны марк тодорхойлох прес, элс хайрагны фракц тодорхойлох шигшүүр, зуурмагны хөдөлгөөнт чанар тодорхойлох багаж, бетон доторх төмөр арматурчлалын байрлал хэмжээг тогтоох автомат багаж, үл хөдлөх аргаар бетоны марк тодорхойлох багаж зэрэг бусад хэмжил зүйн багажаар хангагдаад байгаа бөгөөд цаашид  улсын хөрөнгө оруулалтаар керамик, будаг зэрэг таван төрлийн шинжилгээ, хийж дүгнэлт гаргах иж бүрэн багаж төхөөрөмжөөр тоноглох юм байна.