Нийслэл хотод хийгдэх томоохон бүтээн байгуулалтын нэг бол Сонгино хайрхан дүүрэг буюу олны нэрлэж заншсанаар 22-ын товчооны өмнө баригдах “Авто худалдааны цогцолбор”  юм. Энэ цогцолборыг барьж байгуулсанаар Улаанбаатар хот дахь авто машины захууд нийслэлээс гарч, хотын замын түгжрэл бага буурна хэмээн үзэж нийслэлийн Иргэдийн төлөөлөгчдийн хурлаар  шийдвэрлэсэн билээ. Түүнчлэн нийслэл дэхь автомашины худалдаа эрхлэгчдийг аравдугаар сарын 1-н гэхэд уг цогцолбор руу албадан нүүлгэхээр болсон.
Тус мэдэгдэлтэй холбогдуулан авто машин, авто сэлбэг борлуулагчдын эрх ашгийг хамгаалах “Их тэнгэрийн хас” үндэсний нийгэмлэгийнхэн сэтгүүлчдэд мэдээлэл хийсэн. Тэд “Авто худалдааны цогцолбор” барьж байгуулах  ажлыг дэмжиж байгаа  ч өнөөдрийн байдлаар тухайн газарт бүтээн байгуулалтын ажил хангалтгүй, зам харилцаа муутай, ажиллах орчин бүрдээгүй тул  дээрх хугацааг сунгуулах хүсэлтэй байгаа аж.


Харин үүнтэй зэрэгцэн “Авто худалдааны цогцолбор”  орон нутгийн өмчит аж ахуйн тооцоот үйлдвэрийн газраас  тус цогцолборын эхний ээлжийн  зам, талбайн барилгын ажлын гүйцэтгэл, бүтээн байгуулалтын явцтай энэ ням гарагт хүрэлцэн ирж танилцахыг санал болгосон юм. Мэдээж бид энэ тухай дараа дахин мэдээлэх болно.