“Эм Си ЭС” группын захиалгаар Хүүхдийн паркын ард баригдаж буй "Шангри Ла" барилга дээр өнөөдөр гал гарлаа. Гал тус барилгын 7 давхраас эхэлж гарсан бөгөөд гал гарсан шалтгааны талаар Онцгой байдлын ерөнхий газрын дарга Т.Дуламдорж хэвлэлийнхэнд мэдээлэл өгсөн юм.

 Барилга дээр гал гарсан тухай дуудлага өдрийн 12 цагт 40 минутад ирсэн бөгөөд Онцгой байдлын гал унтаах 3 ангийн 6 машин, 40-өөд авран хамгаалагч нар 5 минутын дотор хүрэлцэн очсон гэнэ. Үүний үр дүнд 23 хүнийг дээврийн давхраас чөлөөлж, амь насыг аюулаас хамгаалж чадсан байна. Энэ тухай Т.Дуламдоржоос тодруулахад:
-Галын нөхцөл байдлын хувьд 22, 23-р давхар шатсан, хэт өндөр учраас манай усны даралт хүрэхгүй маш хэцүү байлаа. Барилгын гадна фасад нэлээд шатсан. Чийгнээс тусгаарлах зориулалтаар дотроо шилэн хөвөнтэй резинэн материалаар фасадыг хийсэн нь гал унтраахад хүндрэл учруулсан. Энэ материалаа Гамшиг судлалын хүрээлэнд галын тэсвэржилтийн лабораторид оруулж, шалгуулсан эсэхийг шалгах хэрэгтэй.

  Одоогийн байдлаар барилгын дотор даралтаар ус өгч гадна фасадыг чийгшүүлж, галыг бүхэлд нь унтраасан.

- Өндөр байшин шатсан тохиолдолд онцгой байдлын алба хаагчид болон техник хэрэгслийн хүчин чадал ямар байна, усны даралт хүрч чадахгүй байна гэлээ шүү дээ?

-Тухайн барилга 80 хувийн гүйцэтгэлтэй, 1-р сард ашиглалтад оруулахаар ажиллаж байсан юм байна. Улсын комисс ажиллахаас өмнө гидрантын асуудлаа шийдсэн байх ёстой. Мөн 80 хувийн гүйцэтгэлтэй байж дотор тавилга, хивс дрожоо хүртэл тавьчихсан байсан. Үүнийг манай байцаагч нар шалгана. Улаанбаатарт үүрэг гүйцэтгэж байгаа манай гал унтраах ангийн шатны машин дээд тал нь 9-н давхарт хүрэх 35 метрийн өндөртэй шат байгаа. Тиймээс бид Ерөнхий сайд болон Шадар сайдад хүсэлт тавьж байгаа. Улаанбаатарт маш олон өндөр шилэн барилга баригдаж байгаатай холбоотойгоор аврах ажиллагааг нисдэг тэргээр зохион байгуулах ёстой гэдгийг хэлж байгаа. Үүнээс өөр ямар нэгэн байдлаар үүрэг гүйцэтгэх боломжгүй юм гэдэг нь өнөөдрийн энэ галаас харагдлаа.  

- Галыг нэлээд удаан хугацаанд унтраалаа. Хүчин чадал хүрэлцэхгүй байсан уу?

Хүчин чадал хангалттай байна. Японы буцалтгүй тусламжаар ирсэн  гал унтраах 22 автомашинаар нийслэлийн хэмжээнд үүргээ сайн гүйцэтгэж байгаа. Манай аврагчид таван минутын дотор ирсэн. Харин бид 35 метрийн шаттай болохоор түүнээс дээд давхруудад гал унтраагчид шатаар гарч, ус зөөн, хүний хүчээр л  галыг унтраалаа. Ер нь Улсын онцгой комиссоос барилгууддаа маш сайн шалгалт хийх ёстой. Барилгынхны асуудал үнэхээр ноцтой хэмжээнд яригдах асуудал болоод байна.

- Зургаан давхрын цонхоор дэлбэрэлт болж, гал авалцсан гэсэн үнэн болов уу?

Дэлбэрэлт болсон зүйл байхгүй. Долоон давхраасаа гал гарсан байна. Гал цахилгаанаас болсон байх  магадлалтай гэсэн урьдчилсан дүгнэлт гараад байна. Долоон давхрын өрөөнүүд  болон гадна фасад шатсан. Бусад өрөөнүүддээ нөлөөлөөгүй байна. Эцсийн дүгнэлт ажлын тав хоногт гарна. Өнгөрсөн жил “Орчлон” хорооллын барилга дээр бас гадна фасадны хөөсөнцөр шатсан хэрэг гарч байсан.