“Барилгын Зөвлөгөө Мэдээллийн Төв” нь 2007 оноос “Барилга-Орон сууц”, “Барилга Экспо” үзэсгэлэн яармагыг 7 жилийн турш тасралтгүй уламжлал болгон зохион байгуулж ирсэн бөгөөд 2010 оны 9 сарын 3-ны өдрийн анхдагч огноотой “Барилга Экспо” үзэсгэлэн яармагийн 9025 тоот, “Барилга-Орон сууц” үзэсгэлэн яармагийн 9024 тоот Монгол улсын барааны тэмдэгийн гэрчилгээг Оюуны өмчийн газарт баталгаажуулж авсан билээ.


         Гэтэл бидний олон нийтэд танил болгож чадсан “Барилга Орон Сууц”, “Барилга Экспо” үзэсгэлэн яармагийн нэр, нэр хүндийг ашиглан бизнесийн ёс зүйгүй үйл ажиллагаа явуулж буй компани сүүлийн үед бий болов.
 “Mongol Exhibition Group” хэмээх байгууллага нь 10-р сарын 15-19-ны өдрүүдэд “Барилга Орон Сууц Экспо” нэртэй үзэсгэлэн яармагийг зохион байгуулах гэж байгаа нь  хэрэглэгчдийг төөрөгдөлд оруулж байгаа төдийгүй Монгол улсын Барааны тэмдэг газар зүйн заалтын тухай хууль, Зохиогчийн эрхийн тухай хууль, Компанийн тухай хууль, Хэрэглэгчийн эрх хамгаалах тухай хуулийг тус тус зөрчиж байгаа юм.
Иймд Барилгын зөвлөгөө мэдээллийн төвөөс дээрх байгууллагад энэхүү үйлдлээ даруй зогсоох тухай шаардсан албан бичиг хүргүүлсэн юм. Уг албан бичгийн хариуд  цаашид ийм асуудал дахин давтахгүй бөгөөд энэ удаа олон нийтэд нэгэнт зар тарсан учир дээрх үзэсгэлэнг зохион байгуулахаас аргагүй болсон тухай  мэдэгдэв.
Мэдээж үзэсгэлэн товын дагуу зохион байгуулагдах нь лавтай. Гэвч зах зээлд шударга өрсөлдөөн л байхаас хэн нэгний олон жилийн санаачлага, хөдөлмөрийн үр дүнд бий болсон зүйлсийг булааж авахыг санаархаж болохгүй билээ.