Хүний амь нас эрсдсэн  осол сүүлийн үед ойр ойрхон гарах болсонтой холбогдуулан Мэргэжлийн хяналтын ерөнхий газар /МХЕГ/-аас өнөөдөр барилгын салбарт бизнес эрхлэж буй компаниудын төлөөллүүдийг хүлээн авч уулзан санал бодлоо солилцлоо. Дөнгөж саяхны жишээ хэлэхэд Дархан-Уул аймагт өчигдөр 13 цагийн орчим 3 хүн барилга дээрээс осолдож 1 хүн амь насаа алдаж, 2 хүн хүнд гэмтэл авсан байна.
Өнөөдрийн уулзалтанд МХЕГ-ын дэд дарга Ю.Галсан, газрын дарга Д.Батмөнх болон бусад газар, албадын дарга нараас гадна нийслэлийн Мэргэжлийн хяналт газрын холбогдох газрын дарга нар оролцсон бөгөөд барилгын 40 гаруй компаний төлөөлөл оролцсон юм.


Уулзалтанд 40 гаруй барилгын компаний төлөөлөл оролцов

Энэ оны эхний гурван улирал буюу есдүгээр сарын 10-ны байдлаар барилгын салбарт нийт 205 удаагийн үйлдвэрлэлийн осол гарч 222 хүн бэртэж, 23 хүн амь насаа алдаж, 13 хүн тахир дутуу болж, 183 хүн хөдөлмөрийн чадвараа түр хугацаагаар алджээ. Харин барилгын салбарт 27 осол гарсан нь нийт ослын 13.2 хувийг эзэлж байгаа аж. Уг нь барилгын салбарт гарах ослын тоо жил ирэх бүр буурч байгаа ч буурч байгаа гээд анхаарлаа хандуулахгүйгээр өнгөрч болохгүй тухай МХЕГ-ын мэргэжилтнүүд ярьж байлаа. Тухайлбал өнгөрсөн онд энэ салбарт 403 осол гарсан байдаг. Тэгвэл энэ жил он дуусахад 1 улирал дутуу байхад 222 осол гарсан гэсэн тоо баримт байгаа юм.

“Зуншин” ХХК-ийн ерөнхий инженер н.Ганбаатар:
Компанийхаа нэрийн өмнөөс Монголын ард түмнээс уучлал гуйя


Барилгын компаниудын төлөөллүүдийн санал бодлыг сонсоход хамгийн түрүүн гараа өргөн саналаа хэлсэн хүн нь “Зуншин” ХХК-ийн ерөнхий инженер н.Ганбаатар байсан юм. Тэрбээр сүүлийн үед хэвлэл мэдээллээр үнэн, худал мэдээдлэл цацагдаж байгаад харамсаж, аливаа зүйлийн учрыг ч сайтар олсны эцэст мэдээллээ олон түмэнд хүргэж байхыг сэтгүүлчдээс хүссэн юм. Түүнчлэн өөрийнх нь байгууллагад 3 ослыг хамааруулж ярьж байгааг буруутган “Манай компанитай холбоотой 1 л осол байгаа. Үүнд бид үнэхээр харамсаж байгаа төдийгүй, Монголынхоо ард түмнээс уучлал хүсье” хэмээн хоолой зангируулах ерөнхий инженерийн үг эрхгүй нэгийг бодогдуулсан.  Мөн тэрбээр “Энд хэлэх нэг зүйл байна. Хүн амьд явах эрхтэй гэж бид Үндсэн хуулиндаа заасан. Тэгвэл эрхтэй юм бол үүрэгтэй байх ёстой. Ний нуугүй хэлэхэд барилга дээр ажиллаж байгаа залуус дотор энэ үүргээ сайн ухамсарлаагүй хүмүүс олон байна. Харин осол гарахад зөвхөн ажил олгогч л буруутай болдог” хэмээн онцолж хэлэхийг хүсч байна хэмээсэн. Мөн хяналтын байцаагч нарын хүрэлцээ болоод хил гаалиар орж ирж буй тоног төхөөрөмжийн хяналт шалгалт сул байгаа талаар олон зүйлийг ярьсан ч дээрх үгийг барилга дээр одоо ч ажиллаж байгаа залууст давхар хэлж анхааруулмаар санагдлаа. Хувь хүн өөрийн аюулгүй байдалдаа анхаарал тавьж болгоомжтой байхаас гадна дүрэм журмыг баримталж, хувцас хэрэглэл болон тоног төхөөрөмжийн бүрэн бүтэн байдлыг шаардаж ажиллах нь чухал юм.

“И си си” компаний ХАБ-ын мэргэжилтэн н.Чинзориг:
ХАБ-ын ажилтан бол “Хаданд хавчуулсан халиуны зулзага”



Тэрбээр Монголд улсад барилгын салбарын хууль, норм дүрэм,  хангалттай бий. Үүнийгээ хэрэгжүүлээд явах нь чухал байгаа тухай дурдаад ийн хэлсэн юм. “Ер нь ХАБ-ын ажилтан гэдэг хаданд хавчуулсан халиуны зулзага шиг нэг тийм хөөрхийлтэй байдалд байна. Мэргэжлийн хяналтаас ирээд сануулга өгөхгүйгээр торгоно шийтгэнэ гэдэг. Харин компаний захирал чи ажлаа хийж чадахгүй байгаа учраас компанийг  торгуульж байна. Чиний цалингаас хасна, суутгана гэдэг. Тэгэхээр үнэхээр бидний буруугаас осол эндэгдэл гарах нөхцөл үүсчихээд байхад анзаараагүй, арга хэмжээ аваагүй бол эхний удаа байцаагч нар нь хэлж сануулдаг байвал зүгээр байна. Мөн барилгын компаниудын захиралуудын ХАБ-ын талаарх мэдлэг ойлголтыг нэмэгдүүлж өгөх хэрэгтэй. Яг үнэндээ ХАБ-ын талаар зөв мэдлэгтэй захирал ховорхон байгаа” хэмээсэн юм.
 
“Тэсо констракшн” компаний ерөнхий менежер н.Хүдэрбаатар:
Хяналт шалгалт хэт олон байна



-Манай компаний эрсдлийн үнэлгээг саяхан хийгээд эрсдэл багатай компани гэсэн тодорхойлолтыг холбогдох байцаагч нь өгөөд явсан. Гэтэл эрсдэл багатай гэсэн хэр нь эрсдлийн үнэлгээ хийгээгүй байхаас илүүтэй хяналт шалгалт нэмэгдсэн. Нэгэнт эрсдэл багатай гэсэн юм чинь үүнийхээ дагуу шалгалт нь арай багасаж болдоггүй юм уу. Мөн байцаагч ямар ч сануулга зөвлөгөө өгөхгүйгээр торгодог асуудал биднийг ч тойроогүй. Саяхан бараг шалтгаангүй шахам торгуулийн хуудас ирээд бид нар төлөхгүй гэж хэсэг гүрийгээд сүүлдээ төлсөн. Энэ мэт дарамт барилгын компаниудад байгаа нь нууц биш хэмээсэн юм.

Ямартаа хяналтын байгууллагаас барилгын салбарынханы энэ мэтээр гомдол саналыг сонсов. Бас бичиж тэмдэглэн тэдэнд учирч буй бэрхшээлийг арилгах тухай ярьсан юм. Мэдээж осол эндэгдэл уулзалт, ярилцлага хийснээр өргөс авсан мэт арилчихгүй ч хоёр талаас уулзан өөрсдийн санал бодлыг сонслоо.