Барилга, хот байгуулалтын яамнаас барилгын 30 гаруй компанийн зураг төслийн инженерүүдэд  Евро кодын талаар ойлголт, мэдлэг өгөх зорилго бүхий 3 өдрийн сургалтыг саяхан зохион байгууллаа. Уг сургалтын хөтөлбөрт орсон лекц, хичээлүүдийг  Москвагийн барилгын их сургуулийн  / МГСУ / Төмөр бетон бүтээцийн тэнхимийн профессор Плотников Александр Ильич, Металл бүтээцийн тэнхимийн дэд профессор Данилов Александр Иванович, Төмөр бетон бүтээцийн тэнхимийн ахлах багш Климов Алексей Николаевич нар заав.
Евро код нь 1975 онд Европын Холбооны Комисс CEC олон улсын нормчлалын системд шилжих хөтөлбөр хэрэгжүүлэх  шийдвэр гаргасан.  Хөтөлбөрийн зорилго нь олон улсын худалдааны саад бэрхшээлийг арилгах, нийтлэг техникийн шаардлага бий болгоход оршиж байсан байна. Ингээд уг хөтөлбөрийн хүрээнд Европын холбооны комисс барилга байгууламжийн бүтээц эдлэлд тавигдах техникийн дүрмийн нэгдсэн систем бий болгох үүднээс гишүүн орнуудын өөр хоорондоо ялгаатай норм дүрмийг халж, техникийн дүрмийн нэгдсэн системтэй болох зорилт тавьжээ. Европын холбооны гишүүн орнуудын төлөөлөгч нарыг оролцуулсан Удирдах хороо 15 жилийн турш Евро кодуудыг боловсруулж, 1980-аад онд анхны хувилбар нь бэлэн болсон байна. 1989 онд Европын холбоо болон Европын стандарчлалын хороо CEN зөвшилцсөнөөр хэвлэн гаргах болон бэлтгэл ажлыг CEN-д шилжүүлсэн нь ирээдүйд Еврокодуудыг Европын Холбооны стандартын статустай болгоход чиглэгдсэн байдаг. Еврокодын хөтөлбөр доорх 10 Евро кодоос бүрдэх бөгөөд Евро код бүр нь хэд хэдэн хэсгээс бүрддэг байна. EN 1990 Еврокод: Барилгын бүтээц төлөвлөлтийн / зураг төсөл боловсруулах / үндэслэл EN 1991 Еврокод: Ачаалал ба үйлчлэл EN 1992 Еврокод: Төмөр бетон бүтээц эдлэл төсөвлөх EN 1993 Еврокод: Ган бүтээц эдлэл төсөвлөх EN 1994 Еврокод: Ган төмөр бетон бүтээц төсөвлөх EN 1995 Еврокод: Модон бүтээц эдлэл төсөвлөх EN 1996 Еврокод: Чулуун бүтээц эдлэл төсөвлөх EN 1997 Еврокод: Геотехник EN 1998 Еврокод: Газар хөдлөлд тэсвэртэй бүтээц эдлэл төсөвлөх EN 1999 Еврокод: Хөнгөн цагаан бүтээц эдлэл төсөвлөх гэх мэт.


Евро кодын давуу талууд нь барилга байгууламжийн зураг төслийг боловсруулахад захиалагч, зураг төсөл зохиогч, гүйцэтгэгч, туслан гүйцэтгэгч, барилгын материал үйлдвэрлэгч нарын харилцан ойлголцох байдлыг хангах, механик бат бэх, тогтвортой байдал, удаан эдэлгээ болон хэмнэлттэй байдлыг үндэслэн галд тэсвэршилтэй байх гэх мэт тодорхой шаардлагуудыг хангах нэгдсэн арга хэмжигдэхүүнээр хангах, Еврокодууд нь Европ дундын судалгаа хийх, редакци засвар хийхэд шаардлагатай судалгааны үндэс болох, судалгааны зардал хэмнэх, Программ  хангамж, зураг төслийн нэгдсэн хэрэгслээр хангах, Иргэний барилгын салбарт үйл ажиллагаа явуулдаг байгууллага, үйлдвэрлэгч, гүйцэтгэгч, зураг төсөл зохиогч нарын өрсөлдөх чадварыг дээшлүүлдэг байна.