Улаанбаатар хотыг нэг өрх хэмээн үзвэл энэ өрхийн тавилга нь барилга байшин, хөшөө дурсгал,  цэцгийн хүлэмж, гэрлэн дохио, автобусны зогсоол, энгийн жижиг хогны сав байх юм. Сая гаруй гишүүнтэй асар том энэ “өрх” өрөөнүүд дотроо төөрч, тавьсан тавилга нь эрээвэр хураавар энд тэндхийн сайн, муу элдэв хэрэгслүүдээр дүүрчээ. Иймд нийслэлийн Ерөнхий төлөвлөгөөний газраас барилга архитектурын чиглэлээр суралцаж байгаа оюутан залуусын дунд нэгэн уралдааныг зарлаж байгаа юм байна. “Их хотын гудамж ” нэртэй энэхүү уралдаан нь Улаанбаатар хот байгуулагдсаны 375 жилийн ойн баярыг тохиолдуулан зохион байгуулж байгаа уг хэмжээ нь бидний ирээдүй болсон хүүхэд залуусын хүсэл мөрөөдөл, тэдний санаа бодлыг чөлөөт байдлаар илэрхийлэх, хотын шинэ дүр төрх, бүтээн байгуулалтын ажилд хувь нэмрээ оруулах эрмэлзлийг нь дэмжихэд орших гэнэ.  Учир уг уралдаанд амжилттай оролцсон бүтээлийг тодорхой хэмжээнд бодит ажил болгох юм байна. Гэхдээ ганцхан зүйлийг өөрчлөх бус бүхэл бүтэн цогц байдлаар нэг гудамж талбайн тохижилтыг шийдсэн бүтээл байх шаардлагатай аж. Түүнчлэн тухайн гудамж талбайн онцлог байдалд тохирч байгаа эсэхийг ч сайтар дүгнэх гэнэ. Иймд уг уралдаанд оролцох хүсэлтэй оюутан залуусыг сайтар бодож, төлөвлөх шаардлагатайг зохион байгуулагчдын зүгээс сануулж байсан юм. Мөн зохион байгуулагчдаас өөрийн биеэр очин зөвлөгөө мэдээлэл авах бүрэн боломжтой аж.
Уралдааны дүнг энэ сарын 15-нд зарлах бөгөөд 10-ны өдрийг хүртэл бүтээлүүдийг хүлээн авахаа дуулгасан. Тэргүүн байрт шалгарсан бүтээлийн эзнийг 3 сая төгрөгөөр байлж, дараа дараагийн байрууд 1 сая төгрөгөөр бууруулан шагнах юм байна.