Барилгаас гарч буй хог хаягдлыг дахин боловсруулах үйлдвэр барих тухай өнгөрсөн хавраас яригдаж, Солонгосын олон улсын хамтын ажиллагааны байгууллага  буюу Koicaгийн 100 хувийн хөрөнгө оруулалтаар үйлдвэр барихаар болсон билээ.
Тус үйлдвэрийн  шав тавих ёслолын ажиллагаа өнөөдөр Нарангийн энгэрийн хогийн цэгт боллоо. Ёслолын ажиллагаанд Хотын Ерөнхий менежер Б.Бадрал, байгаль орчны чиглэлээр ажилладаг холбогдох байгууллагууд Koicaгийн төлөөлөгчид, хэвлэл мэдээллийнхэн оролцсон юм.




шав тавих ёслолын үеэр

 Энэхүү үйлдвэр нь 1500-2000 тонн хогийг дахин боловсруулах хүчин чадалтай бөгөөд Нарангийн энгэрийн хогийн цэгт ирж буй барилгын хогийг 5 мм хүртэл буталж, шигшин угааж, хатаан 0.7мм хүртэл тээрэмдэж, үндсэн түүхий эдээ гарган авна. Бэлэн болсон түүхий эдийг цэвэрлэсэн үнс болон бусад зүйлүүдтэй хольж өндөр даралтаар хатаан эцсийн бүтээгдэхүүнээ гаргах юм. Ингэхдээ шатаах зуух ашиглахгүй бөгөөд тохижилтонд ашиглах боржуур, замын хавтан, блок болон бусад бүтээгдэхүүнийг үйлдвэрлэх юм.  Үйлдвэр нь жин хэмжих өрөө, ажилчдын оффис, дахин боловсруулах хайрга чулуу бэлдэх үйлдвэр,дахин боловсруулах бүтээгдэхүүний үйлдвэр, дахин боловсруулах боломжтой хайрга чулууны газар, дахин боловсруулах боломжгүй хайрга чулууг тавих газар, дахин боловсруулах боломжгүй хайрга чулууг булах газар, тоног төхөөрөмжийн хяналтын өрөө, агуулах, машины зогсоол, буудал, цайны газар амралтын өрөөтэй байхаар төлөвлөгдсөн бөгөөд ирэх жилийн 5 сард ашиглалтанд орох гэнэ.
Нийслэлийн хэмжээнд  өвлийн улиралд 61084 тонн, зун 127428 тонн барилгын хог хаягдал гардаг. Тус үйлдвэр ашиглалтанд орвол энэ хэмжээний хог хаягдал газарт булагдах бус боржуур, замын хавтан, блок болон дахин ашиглагдах боломжтой болох юм.