Өнөөдөр дэлхийн архитектурын өдөр. Энэ өдрийг Монголын архитектурын эвлэл /МАЭ/ санаачлан 10 гаруй жил тэмдэглэн өнгөрүүлж байна. Дэлхийн архитекурын холбооноос жил бүрийг нэг уриа гарган түүний хүрээнд ажил үүргээ түлхүү явуулдаг уламжлалтай. Энэ жилийн уриа нь “Эрүүл аз жаргалтай хот”.  Мэдээж манай улс ч энэ уриаг чухалчилж, ажиллаж буй. Тийм ч учраас дэлхийн архитектурын эл өдөр “Бидний мөрөөдөж буй аз жаргал” сэдэвт лекц, семинарыг зохион байгуулсан юм.
Эрүүл аз жаргалтай хот гэдгийг энгийнээр хэлбэл ногоон байгууламж элбэг “ногоон хот” байгуулах тухай юм. Дэлхийн нийтийн сүүлийн үеийн чиг хандлага хот хүрээлэнд ногоон байгууламжийг нэмэгдүүлэх, тэр тусмаа ногоон барилгыг олноор барихыг эрмэлзэх болсон билээ.  Ногоон барилга гэдэг нь эрчим хүчний хэмнэлттэй дэвшилтэт технологи нэвтрүүлсэн, хүний эрүүл мэнд болон байгаль орчинд ээлтэй гээд маш олон хүрээний асуудлыг хамарсан ойлголт юм. Гэхдээ архитектурын хүрээнд ногоон байгууламжийг барилгад тодорхой хэмжээгээр шийдэж өгөх болсон юм. Тухайлбал Японд зөвхөн ийм төрлийн байгууламж бүхий дүүрэг бий болж эхэлж байгаа гэнэ. Арабын нэгдсэн улс, БНСУ-д ч ногоон барилга олноор баригдах болсон байна.
Манай орны хувьд дэлхий нийтийн энэ чиг хандлагыг соргогоор хүлээн авч хэрэгжүүлэх шаардлагатай байгаа талаар “Бидний мөрөөдөж буй аз жаргал” сэдэвт лекц, семинарт оролцогсод дурдаж байсан юм. Яагаад энэ чиг хандлагыг дагах шаардлага байгаа талаар доорх хэд хэдэн нөхцөл байдлыг дурдсан.
Юуны өмнө манай улс эрс тэс уур амьсгалтай, цөлжилтөөс эхлээд байгаль экологийн асуудал хурцаар яригдаж байгаа энэ үед ногоон хотыг чухалчилах нь юу юунаас илүүтэй гэнэ. Мөн манай орон цэвэр усны хомсдолтой орны тоонд багтдаг, нийслэл хотод агаар болон хөрсний бохирдол ихтэй энэ үед ногоон хотыг мөрөөдөх бус хэрэгжүүлэх тухай ярих цаг болсон тухай ярьж байсан юм. Манай үе үеийн архитекторчид уг семинарт идэвхтэй оролцсон юм.


үзэсгэлэнгийн үеэр




Дэлхийн архитекторын өдрөөр МАЭ-ээс нэгэн сонирхолтой үзэсгэлэнгийн нээлтийг хийсэн. БНХАУ-ын архитектурын өнөөгийн чиг хандлагыг харуулсан энэхүү үзэсгэлэнд сүүлийн жилүүдэд өмнөд хөршид баригдсан өвөрмөц содон барилга байгууламж болоод архитектурын шинэлэг бүтээлүүдийг гэрэл зургаар дэлгэн харуулжээ. Эдгээр барилгын ажлын зургийг Хятадын Архитектурын байгууллагаас албан ёсны зөвшөөрөлтэйгээр файлаар хүлээн авч дэлгэн харуулж байгаа нь энэ аж. Манай улсад өмнө нь БНСУ болон БНАСУ-ын архитектурын үзэсгэлэн  албан ёсоор дэлгэгдэж байсан бол энэ удаа Хятадын архитектурын үзэсгэлэн ийнхүү нээлтээ хийлээ. Өнөөдрөөс эхлэн МАЭ-ийн байранд сар орчмыг турш дэлгэгдэх энэхүү үзэсгэлэнг сонирхсон хүн бүр үзэх боломжтой юм.
Мөн МАЭ-ээс шинэ оны дараахан  ОХУ-ын архитектурын үзэсгэлэнг нээх тухайгаа дуулгаж байна лээ.