Цагийн зүү урагшилсаар нэг л мэдэхэд шинэ он хаалга тогшлоо. Хийж бүтээсэн ажил үйлсийнхээ амжилт ололтдоо баярлан урамшиж бас алдаа оноо болон ирээдүйд хийх ажлаа дэнслэн хянах яг ийм цаг хугацааны  мөчлөгт та бид тулж ирэээд байна.
      Барилгын Зөвлөгөө Мэдээллийн Төвөөс эрхлэн гаргадаг “Барилга.МН” сэтгүүлийн хамт олон барилгын салбарын №1 мэдээллийн хэрэгсэл байж, энэ салбарт тулгамдсан асуудал, шийдвэрлэх арга зам, ололт амжилт, ахиц дэвшил, шинэ техник технологи, содон соргог мэдээ мэдээлэл, дэлхий нийтийн барилгын салбарын хөгжлийн чиг хандлагыг тасралтгүй хүргэсээр тав дахь оноо үдэх гэж байна. Аливаа зүйлийг хийхийн хэрээр суралцаж, түүний хэрээр хөгжин дэвжиж байдаг. Манай хамт олон ч жилээс жилд ололт амжилт баялаг байж, цаашид хийж бүтээх оргилуун хүсэл эрмэлзлээр дүүрэн байна.
        Мэдээллийн эрин зуунд сэтгүүлтэйгээ зэрэгцэн ажилладаг www.barilga.mn вэбсайт маань ч хэрэглэгч та бүхэнд барилга, бүтээн байгуулалтын салбарын өдөр тутмын мэдээ мэдээллийг цаг алдалгүй, түргэн шуурхай, цогцоор нь хүргэж, уншигчид, харилцагчдынхаа маркетингийн үйл ажиллагаанд үргэлж дэм болохыг хүсэж, хэрэгжүүлсээр ирлээ.

        Түүнчлэн жилд хоёр удаа, хавар намартаа уламжлал болгон зохион байгуулдаг, салбарынхны маань хүсэн хүлээдэг “Барилга Экспо” үзэсгэлэн жил тутам өргөжин тэлж, олон улсын хэмжээнд зохион байгуулагдах боллоо.

     Техник технологийн хөгжилтэй зэрэгцэн Барилга.МН аппликейшн нь ухаалаг гар утсанд суурилагдан нийт хэрэглэгчиддээ хүрэх боломжтой болсны дээр бид вэбсайтаа улам бүр баяжуулан барилгын компани, аж ахуйн нэгжүүдэд олон шинэ боломжийг санал болгосоор байна.
Ирэх онд манай хамт олон барилгын салбарынхныхаа хамтын ажиллагааны уялдаа холбоог сайжруулан энэ талбарын гол холбогч гүүр нь байж “Таны бизнесийн хурдасгуур” уриан дор сэтгүүл болоод вэбсайт маань улам бүр эрч хүчтэйгээр тэмүүлж ажиллах урам зориг дүүрэн байна.

Бид сэтгүүл, сайтаараа дамжуулан иргэд, уншигчид, харилцагчид, олон нийтдээ зориулан орон сууц, барилгын материалын үнэ ханшийн талаарх үнэн бодит мэдээллийг илүү өргөн хүрээнд нарийвчлалтайгаар хүргэсээр байхын сацуу барилгын салбарын шинэлэг хурдацтай хөгжлийн мэдээллийг агуулсан телевизийн брэнд нэвтрүүлгийг ч хүргэх болсноо дуулгахад таатай байна.
       Ингээд хуучин оноо амжилт бүтээлээр арвин үдэж байгаа манай хамт олон Монголын  барилгын салбарынхан, аж ахуйн нэгж, байгууллагууд, инженер техникийн ажилтнууд, нийт  барилгачид, бүхий л хамтран ажиллагч түншүүддээ шинэ оны баярын гал халуун мэндийг хүргэе. Бидний хамтын ажил үйлс золгож байгаа онд улам батжин хөгжиж, амжилтаас амжилтад тэмүүлэх болно.
Ирэх 2015 онд та бүгдийн маань төлөвлөсөн ажил бүр сэтгэлчлэн бүтэж, өөдлөн дэвжихийн өлзийтэй ерөөлийг өргөхийн ялдамд аз жаргал, сайн сайхан бүхний дээдийг хүсэн ерөөе.

 
 
Та бүхний юу санасан есөн цагаан хүсэл биелэх болтугай.
“Барилга.МН”-ийн Хамт Олон