УИХ-ын гишүүн, УИХ-ын Эдийн засгийн байнгын хорооны дарга Ж.Батсуурь тэргүүтэй Эдийн засгийн байнгын хорооны төлөөлөл өнөөдөр Барилга хот байгуулалтын яам /БХБЯ/-ны үйл ажиллагаатай танилцлаа. Уулзалтанд тус яамны шинэ сайд Д.Цогтбаатар, дэд сайд Г.Байгалмаа, төрийн нарийн бичгийн дарга Р.Эрдэнэбүрэн болон газар, алба, хэлтсийн дарга нар байлцсан төдийгүй Барилгын хөгжлийн төвийн захирал Б.Баярсайхан оролцож, барилгын салбарт тулгамдаж байгаа асуудал болоод хийж буй ажил, цаашид хэрэгжүүлэх бодлогын  талаар ярилцсан юм.

 

     Улс орны эдийн засаг хямралтай байгаа энэ үед Төрийн эдийн засгийн бодлого боловсруулж байгаа эрхмүүдэд өөрсдийн салбарын өнөөгийн нөхцөл байдлыг танилцуулсан энэхүү чухал уулзалтын үеэр яригдсан үндсэн асуудал нь Улсын төсвийн тодотгол удахгүй хийгдэх гэж байгаатай холбогдуулан барилгын салбарын хөрөнгө оруулалтыг аль болох танахгүй байх тухай байсан. Тийм ч учраас сайд Д.Цогтбаатар “Эдийн засгийн хямралын үед хоёр салбар мөнгөтэй байх ёстой. Нэгдүгээрт банкны салбар, хоёрдугаарт барилгын салбар хэмээн онцолсон. Түүнчлэн энэ үгээрээ би салбараа хамгаалж байгаа хэрэг биш бөгөөд энэ хоёр салбар чадвартай байх нь улс орон чадвартай байхын үндэс гээд биднийг дэмжиж ажиллах онцгой шаардлага байгаа юм” гэлээ.

Харин Ж.Батсуурь  зөв зүйлийн төлөө хамтарч, дэмжиж ажиллахад хэзээд бэлэн тухайгаа хэлээд барилгын салбарт бодлогын түвшинд шийдэх зайлшгүй шаардлагатай, нэн түрүүнд хийх ёстой ажлаа маш тодорхой болгоод Улсын Их Хуралд оруулаад ирвэл дэмжиж ажиллах нь бидний үүрэг хэмээсэн юм. Мөн улс орны эдийн засаг үнэхээр хүндрэлтэй байгааг онцлож, салбарын яам орон сууц, барилга барьж байгаа компаниудын чадвар чадамж төдийгүй иргэдийн эрэлт хэрэгцээ, худалдан авах чадвар зэргийг харгалзан бодлогын зөв зохицуулалт хийх зайлшгүй шаардлагатайг санууллаа.