Улс орны хөгжлийн түүхэн үе шатанд үндэсний инженер техникийн мэргэжлийн боловсон хүчнийг гадаад дотоодод бэлтгэх зайлшгүй шаардлага бий болсонтой уялдуулан БНМАУ-ын Сайд нарын зөвлөлийн тогтоолоор 1959 онд МУИС-ийн бүрэлдэхүүнд Барилгын инженерийн ангийг нээснээр Барилга, Архитектурын Сургуулийн үндэс суурь тавигдсан түүхтэй.
Монголын дээд боловсролыг өөрчлөн шинэчлэх, ардчиллыг тууштай нэвтрүүлэх талаар Техникийн их сургууль манлайлан ажиллаж, сургалтын зохион байгуулалтад кредит тогтолцоог тууштай нэвтрүүлж, сургалтын үйл ажиллагааг ардчилсан зарчмаар өөрчилж чадсан юм. Түүнчлэн их сургуулийн бүтэц зохион байгуулалтыг зах зээлийн нөхцөлд зохицуулан өөрчилж, сургууль, профессорын баг, судалгааны төвийн бүтцийг хэрэгжүүлсэн.

Техникийн их сургуулийн гадаад харилцаа эрс өргөжиж, олон улсын их сургуулиудын сүлжээнд хамрагдсан юм. Энэхүү өөрчлөлт шинэчлэлийн үр дүнд Техникийн их сургууль нь Монгол улсын Шинжлэх ухаан, Технологийн их сургууль болтлоо өргөжин бэхжсэн байна.

Өдгөө Барилгын инженер, Архитектур, Хүрээлэн буй орчин гэсэн 3 чиглэлээр инженерүүдийг бэлтгэдэг 181 профессор, багш ажилтантай бакалавр, магистр, доктор нийлсэн 4000 орчим оюутантай томоохон сургууль болтлоо өсөн дэвжсэн байна. Энэ жилийн хувьд Барилга архитектурын Сургууль байгуулагдсаны түүхт 55 жилийн ойтойгоо учран золгож байна.