Мэргэжлийн хяналтын ерөнхий газраас энэ онд инженерийн шугам сүлжээний хамгаалалтын зурвас, аюулгүй байдалд хяналт шалгалт хийж хамгаалалтын зурваст 5588 объект байгааг тогтоолоо. Үүнээс 85 орчим хувь нь цахилгаан дамжуулах, түгээх шугамын зурваст байгаа юм. Зөрчил дутагдал гарч буй үндсэн шалтгаан нь иргэн, аж ахуйн нэгж байгууллагууд зөвшөөрөлгүйгээр дур мэдэн инженерийн шугам сүлжээний хамгаалалтын зурваст гэр, хашаа, байшин, граж, агуулах зэрэг барилга объект барих, мөн нийслэл, дүүргийн Засаг дарга нар инженерийн шугам сүлжээний хамгаалалтын зурваст хангагч байгууллагын зөвшөөрөлгүйгээр давхардуулан газар олголт хийдгээс үүсдэг байна. 

Энэ нь инженерийн шугам сүлжээний аюулгүй байдал, хэвийн найдвартай ажиллагааг алдагдуулж, засвар үйлчилгээ хийх нөхцөл боломжийг алдагдуулан, улмаар хэрэглэгч цахилгаан, дулаан, цэвэр усны хангамж удаан хугацаагаар тасрах, харилцаа холбооны тасралтгүй найдвартай ажиллагаа алдагдах нөхцөлийг бүрдүүлж байгаа юм. Түүнчлэн инженерийн шугам сүлжээний хамгаалалтын зурваст иргэн, аж ахуйн нэгж байрласнаас хүний эрүүл мэнд, эд хөрөнгөөрөө хохирч, амь насаа алдах ч эрдсэлтэй байна. 



Шалгалтын явцад 78 аж ахуйн нэгж байгууллагад зөрчил арилгуулах улсын байцаагчийн хугацаатай албан шаардлага хүргүүлж, 8,2 сая төгрөгийн торгууль ногдуулан, зөвшөөрөлгүй 10 объектыг буулгах, нүүлгэн шилжүүлэх болон 40 гаруй аж ахуйн нэгж байгууллагын газрын захирамжийг хүчингүй болгуулах талаар ажиллаж байна.