Монголбанк болон үл хөдлөх хөрөнгийн “Тэнхлэг зууч”, “Актив зууч”, “Монголиан Пропертис” компанийн консорциум хамтран энэ оны 10-р сарын “Орон сууцны үнийн индекс”-ийн (ОСҮИ) судлагааг олон нийтэд танилцуулж байна. Энэхүү тооцоо нь тухайн сард Улаанбаатар хотод борлуулагдахаар зах зээлд нийлүүлэгдсэн шинэ, хуучин бүх төрлийн орон сууцны үнийг хамруулан тооцсон аж.
Тус судалгаагаар ОСҮИ 10-р сард суурь үе буюу 2013 оны 1 сараас 19.7 хувийн өсөлттэй гарчээ. Энэ нь өмнөх сараас -2.68 хувь буурсан үзүүлэлт гэнэ. Өөрөөр хэлбэл, зах зээлд нийлүүлэгдэж буй орон сууцны зах зээлийн үнэ 10-р сард өмнөх сараас 2.68 хувь буурчээ. Харин уг индексийг оны эхэн үетэй харьцуулахад 0.076 хувь өссөн бол, өнгөрсөн оны мөн үетэй буюу 12 сарын өмнөхтэй харьцуулахад 1.86 хувийн өсөлттэй байгаа юм байна.

 

Энэ удаа ОСҮИ-ийг Улаанбаатар хотын орон сууцны зах зээлийн онцлогт хамгийн сайн тохирсон гэж үзсэн шинэ загвараар тооцож, өмнөх саруудын тооцооллыг урагш нөхөж шинээр тооцжээ. Мөн ОСҮИ-ийг Хедоник регрессийн аргаар тооцож буй бөгөөд индекс тооцох судлагааны ажилд Эдийн засгийн судалгаа, эрдэм шинжилгээний хүрээлэн арга зүйн зөвлөгөө өгч, хамтран ажилласан байна.