Их сургуулиудын хотхоны ерөнхий төлөвлөгөө батлагдсан тухай бид өнгөрсөн 7 хоногт мэдээлж байсан билээ. Энэ удаа бага боловч дэлгэрэнгүй мэдээлэл хүргэх зорилгоор энэхүү мэдээллийг нийтлэж байна.
Багануурын дүүргийн нутаг дэвсгэрт баригдах Их сургуулиудын хотхоны ерөнхий төлөвлөгөө нь Монгол Улсад одоо мөрдөгдөж буй норм, норматив, стандартын дагуу хийгдсэн бөгөөд хот төлөвлөлтийн орчин үеийн шийдэл, технологи, ноу-хауг тусгасан. Мөн байгаль орчинд ээлтэй эко хот, ногоон байгууламж, хонгилын систем, сэргээгдэх эрчим хүчийг ашиглах боломжийг тусган, иж бүрэн, орчин үеийн шаардлагад нийцсэн хот төлөвлөлт хийснээрээ онцлогтой гэнэ. Уг хотхон бүрэн ашиглалтанд орсноор, 17,916 өрхийн 66,250 хүн, 100 мянган оюутан, нийт 166, 250 хүртэлх хүн ам бүхий шинэ суурьшлын бүс, Улаанбаатар хотын дагуул хот бий болж, авто замын ачаалал, агаар, хөрсний бохирдол, бусад хүндрэлтэй асуудлуудыг бууруулах давхар ач холбогдолтой гэж холбогдох хүмүүс үзэж байгаа юм байна. Мөн шинээр ажлын байр нэмэгдэж, хөгжлийн шинэ төв бий болохоос гадна бүс нутаг, цаашлаад Монгол Улсын боловсрол, шинжлэх ухаан, инновацийн төв болох нь лавтай.
Иймд Их сургуулиудын хотхоны төлөвлөлтийг 4 үе шаттайгаар хийсэн бөгөөд эхний ээлжинд Шинжлэх ухаан, технологийн их сургуулийн бүс, Шинжлэх ухааны паркийн бүсийг одоо  бэлэн байгаа дэд бүтцийн эх үүсвэрийг ашиглан эхлүүлэх боломжтой ажээ.