Хувцас эдлэлд мода байдгийн адил барилга байгууламжийн дотоод засал хүмүүсийн сэтгэлгээний байдлаас шалтгаалан өөрчлөгдөж байдаг. Энгийнээр интерьерт ч бас мода байдаг. Магадгүй энэ нь манайд хожуу орж ирсэн ухагдахуун ч гэсэн Монгол хүний өөрийн бий болгосон интерьерийн урлаг тусдаа бий юм. Гэхдээ энэ удаа Монгол интерьерийн талаар дурдах гэсэнгүй. Эрхэм уншигч та энэ талаар сонирхож байвал “Барилга.МН” сэтгүүлээс жил бүр уламжлал болгон хэвлүүлдэг “Интерьер дизайн” сэтгүүлийн 2014 онд гарсан дугаараас илүү дэлгэрэнгүй танилцаж болно.
Харин интерьерийн ирэх оны дэлхий нийтийн чиг хандлага буюу 2015 оны загвар, хийцийн талаар өөрийн олсон мэдсэнээ хуваалцахаар шийдлээ.
 
Ногоон бас дахин ногоон
 
Сүүлийн жилүүдэд барилгад ногоон барилга буюу эрчим хүчний хэмнэлттэй, байгаль орчинд ээлтэй байхыг чухалчлахаас гадна барилгын гадна, дотор хийцэд ногоон хийц, ногоон байгууламжийг оруулахыг илүүд үзэх болсон. Ийм ч учраас  2015 онд ногоон орчин бүхий дотоод заслыг илүүд үзэж, гэрийн ханын нэг хэсэг, тодорхой орчинг цэцэг, ногоон ургамлаар бүрхсэн байдалтайгаар засч тохижуулах гэнэ. Өөрөөр хэлбэл амьдарч буй барилга тань ногоон байх төдийгүй дотоод засал ч мөн ногоон орчинтой байх гэнэ. Мөн бодит ногоон орчин үүсгээгүй ч гэсэн гурван хэмжээст бүхий ханын цаас иргэдийн сэтгэлд ихээхэн нийцнэ ч гэж таамаглаж байгаа юм байна. Мэдээж энэ нь ямар дүрс чимэглэлтэй байх нь хүмүүсийн сэтгэлгээний онцлогоос шалтгаалаад өөр өөр байх ч байгалийн зураг бүхий ханын цаас борлуулалт ихтэй байж болох гэнэ.






 
Байгалийн бас энгийн
 
Хүн төрлөхтөн гял цял гоёмсог эд зүйлсээс илүү байгалийн гаралтай, мөн энгийн хэрэглэхэд хялбарыг сонгох болсоор нэлээд хэдэн жилийг үдэж байгаа билээ. Энэ өнгө аяс 2015 онд ч мөн хадгалдах бөгөөд зөвхөн нэг өнгийг дагнасан дотоод засал голлох гэнэ. Олон нийтийн барилга байгууламжид, айл өрхийн хувьд ч өрөөний онцлогоос шалтгаалан нэг өнгийг дагнан зөвхөн тэр өнгийг голчилсон байх юм. Тавилга хэрэгсэл ч байгалийн модон өнгийг зонхилсон байх аж.