Нийслэлийн хэмжээнд газрыг цахим хэлбэрээр иргэдэд өмчлүүлэх ажил нэлээдгүй олны анхааралд өртөж, иргэд идэвхтэй оролцсон билээ. Энэ ажлын эхний хэсэг болох  таван дүүргийн таван байршилд цахим хэлбэрээр газар өмчлүүлсэнээс одоогийн байдлаар 12.911 иргэн цахим хэлбэрээр газар өмчлөн аваад байгаа аж. Харин цахим системд сонгогдож газар өмчлөн авах эрх нь үүссэн буюу сонгогдсон иргэдийн тодорхой хувь нь өргөдөл хүлээн авах заасан хугацаанд харьяа дүүрэгтээ хандаж өргөдлөө өгөөгүй тухай холбогдох байгууллагаас мэдээлсэн.
Тиймээс тэдгээр иргэдийн сонгогдсон эрхийг нь хүчингүйд тооцож, үлдсэн сонгогдоогүй иргэдийн дунд дахин цахим системээр сонголт хийсэн байна. Дахин сонголт явуулж өргөдөл хүлээн авах хугацааг олон нийтэд заралснаас хойш дүүргүүдийн Өмч, газрын харилцааны алба цөөнгүй өргөдлийг хүлээн авч байгаа боловч иргэдийн оролцоо сул байгааг дурджээ.
Тиймээс сонгогдсон иргэд идэвхтэй оролцохоос гадна сонгогдсон эсэхээ мэдэхийн тулд www.umch.ub.gov.mn цахим хуудаснаас “ГАЗАР ӨМЧЛӨЛИЙН ЦАХИМ СИСТЕМЭЭР СОНГОГДСОН ЭСЭХЭЭ ШАЛГАХ ХАЙЛТЫН СИСТЕМ” гэсэн цонх руу орж өөрийн регистрийн дугаараа оруулж шалгах бүрэн боломжтой гэнэ.

Дахин сонгон шалгаруулалтын өргөдөл хүлээн авах хугацаа өнөөдөр дуусах юм байна. Иймд иргэд та бүхэн цахим хэлбэрээр газар өмчилж авахаар бүртгүүлсэн бол сонгогдсон эсэхээ шалган өнөөдрийн дотор өргөдлийн материалаа бүрдүүлэн өгөөрэй.
 
Өргөдөл өгөхөд бүрдүүлэх материал
 
Өөрийн биеэр хүрэлцэн ирж бүртгүүлж буй иргэд иргэний үнэмлэхний хуулбар /нотариатаар батлуулсан байх/
18 нас хүрээгүй хүүхэд итгэмжилж байгаа бол тухайн хүүхдийн төрсний гэрчилгээний хуулбар, эхийн иргэний үнэмлэхний хуулбар / тус бүр нотариатаар батлуулсан байх/
Өөрийн биеэр хүрэлцэн ирэх боломжгүй болон гадаадад оршин сууж байгаа иргэдийн төлөөлөл нотариатаар батлуулсан итгэмжлэлийг нэмэлтээр бүрдүүлнэ очино.