Гурван жилийн өмнөөс шахам  “Улаанбаатар хотын усан хангамжийг нэмэгдүүлэх төсөл”-ийг Японы буцалтгүй тусламжаар “ЖАЙКА”-гаас хэрэгжүүлсэн бөгөөд нийт 68 тэрбум төгрөгийн хөрөнгө оруулалт хийжээ. Дээрх “Ундны усны Гачууртын эх үүсвэр”-ийг хүлээлгэн өгөх ёслолын ажиллагаа саяхан болж,  холбогдох албаны хүмүүс оролцсон байна.
Энэхүү төслийг хэрэгжүүлснээр Туул голын ай савын Гачуурт дахь хэсэгт 21 гүний худаг шинээр барьсан бөгөөд олборлосон усыг Гачуурт усан санд хуримтлуулан ариутган цэвэршүүлсний дараа ф700 мм-ийн диаметр бүхий хоолойгоор дамжуулан Улаанбаатар хотын зүүн, хойд бүсийн усан санд нийлүүлж хотын ус хангамж, тэр дундаа гэр хорооллын усан хангамж нэмэгдэж байгаа юм.
      Тодруулбал: Хайлааст, Дамбадаржаа, Чингэлтэй, Долоон буудал мөн Сүхбаатар дүүргийн гэр хороооллын айлуудын усан хангамж сайжрах юм.  Гачууртаас зүүн хойд бүсийн усан сан хүртэлх магистрал шугамд шилээр хүчитгэсэн пластик болон шилээр хүчитгэсэн зуурмагийн нийлмэлээс бүтсэн пластик хоолойг цэвэр усны шугамд ашиглаж байгаа нь техникийн хувьд мөн дэвшилт болжээ. Энэхүү хоолой нь хөнгөн жинтэй, нягтаршил ихтэй, бат бөх, эдэлгээ удаан бөгөөд угсархад хялбар, хүчил шүлтэд тэвсэртэй тул хөрс, усны төрөлд ашиглах бүрэн боломжтой зэрэг олон давуу талтай юм байна. Шинэ эх үүсвэрийн үйл ажиллагааг удирдлагын төвөөс бүрэн хянах боломжтой аж. Ус сувгийн удирдах газрын дарга С.Үнэнгийн ярьсанаар тус газар 240 мянга орчим куб метр усыг Улаанбаатар хотын хэрэгцээнд нийлүүлэх судалгаа байдаг аж. Харин одоогийн байдлаар дунджаар 160-170 метр куб усыг нийслэлийн ундны усан хангамжид нийлүүлж байгаа гэнэ. Энэхүү шинэ эх үүсвэр баригдсанаар нийслэлийн ундны усны хангамжийг  хоногт 25.000 метр куб цэвэр усаар нэмэгдүүлэх юм байна.