Сүүлийн хэдэн жилд Улаанбаатар хотын барилгажилт эрчимжиж, газар л олдож байвал хаа сайгүй нийтийн орон сууц, оффис, худалдааны төвийн барилга олноор барих болсон. Хэдэн айлын орон сууц, оффисын өндөр барилга барьж  зараад мөнгө олж байвал хүүхдүүд  тоглоомын талбайгүй үлдэнэ үү, оршин суугчид нар үзэх эрхээ хязгаарлуулж харанхуй хана ширтэнэ үү тэдэнд ердөө падгүй.  Улаанбаатар хотод нийтийн эзэмшлийн талбайд дураараа барьсан, орон сууцны айлуудын цонхыг хаасан барилгууд ар араасаа нэмэгдсээр л байна.
      Харин Нийслэлээс энэ байдлыг хязгаарлах үүднээс хүүхдийн тоглоомын талбай, ногоон байгууламж, орон сууцны дундах нийтийн эзэмшлийн зам талбайд барилга барих бол эргэн тойрны оршин суугчдаас зөвшөөрөл авах ёстой гэсэн журмыг баталсан.
      Энэ талаар НИТХ-ын дарга Д.Баттулга хэлэхдээ “ Оршин сууж байгаа иргэдийн 70 хувь нь барилга барихыг зөвшөөрсөн тохиолдолд барилгын ажил эхлүүлэх боломжтой. Энэ бүхэн өнгөрсөн тавдугаар сард баталсан “Нийтийн эзэмшлийн зам талбайд барилга байгууламж барих эрх олгох” журмаар зохицуулагдана. Гэхдээ журам батлагдахаас өмнө нийтийн эзэмшлийн зам талбайд барилга барих зөвшөөрөл олгосон бол олон нийтээс зөвшөөрөл авахгүй. Гэсэн ч энэ асуудлыг зохицуулах талаар судалж байна” гэсэн юм.