Хот төлөвлөлт, хүний амьдрах ая тухтай орчинг бүрдүүлж чадсан хотуудын тоонд Сингапур зүй ёсоор орно. Иймд тэдний туршлагыг судлах зорилгоор БХБЯ Нийслэлийн засаг даргын тамгын газар, Төрийн орон сууцны корпорацийн  мэргэжилтнүүд өнгөрсөн 2-р сард тус улсад айлчлаад ирсэн билээ. Энэхүү туршлага судлах ажлын үргэлжлэл болгож  өнөөдөр “Хот төлөвлөлт ба Сингапурын туршлага” сэдэвт семинарыг БХБЯ-наас зохион байгууллаа. Семинарт оролцохоор Сингапурын  Парламентын гишүүн, “Амьдрах таатай хотууд” төвийн хүндэт захирал Ма Бау Тан мөн тус төвийн гүйцэтгэх захирал Ку Тэн Чай,   Сингапурын “Орон сууц ба хөгжлийн зөвлөл” –ийн борлуулалт хариуцсан захирал Ло Суий Хен нарын тэргүүтэй 10 гаруй гишүүний бүрэлдэхүүнтэй баг манай улсад хүрэлцэн ирсэн байна. Иймд өнөөдөр манай хот байгуулалтын салбарт үйл ажиллагаа явуулдаг төрийн болон төрийн бус байгууллагууд, аймаг орон нутагт мэргэжлийн үйл ажиллагаа эрхэлж буй аж ахуй нэгжийн төлөөлөл тус семинарт оролцон Бүгд найрамдах Сингапур улс хотоо хэрхэн төлөвлөж, хэрхэн амжилттай ажилласан талаарх лекцийг бүтэн өдрийн турш сонсох нь. БХБ-ын сайдын урилгаар ирсэн хүндэт зочид өөрсдийн ажлын туршлагаасаа хуваалцан илтгэл тавих юм.