Нийслэл хотын өнгө төрхийг сайжруулах, иргэдийнхээ ая тухтай амьдрах орчинг бүрдүүлэх үүднээс Улаанбаатар хотын Захирагчийн   ажлын алба, нийслэлийн “Нийтийн тээврийн газар” болон “Авто замын газар”хамтран “ Худалдаа хөгжлийн банк”-тай хамтын ажиллагааны гэрээ байгуулан  нэгдсэн стандарт бүхий нийтийн тээврийн зогсоол барьж эхэллээ.  Гэрээний хүрээнд гүйцэтгэгч компаниуд Францын "JCDecaux" группээс  зөвлөгөө, тусламжийг авах бөгөөд Улаанбаатар хотын 200 цэгт автобусны буудал, гудамж талбайн байршил заасан чиглүүлэгч, тээврийн хэрэгсэл, такси,  дугуйн замын зогсоолын  хүлээлгийн талбайд байгууламж барих юм.  

   Автобусны зогсоол нь нар, салхинаас хамгаалах хамгаалалтын саравчтай, зэвд тэсвэртэй,  олон улсын стандартын дагуу халуун цайраар шүршсэн төмөр хийцтэй байх гэнэ. Буудлын нэр болоод явах чиглэлийг тодорхой бичсэн байх төдийгүй мэдээллийн самбарууд нь усны хамгаалалттай, тог бага зарцуулдаг led гэрэлтүүлэгтэй хийхээр төлөвлөж байгаа аж.
Мөн хөгжлийн бэрхшээлтэй иргэдэд зориулсан мэдээлэл түгээх аудио төхөөрөмжтэй. Энэхүү төхөөрөмж нь нарны энергиэр ажилладаг  нэмэлт зай хураагууртай, 5 м радиуст дуу авиаг дамжуулах бөгөөд автобус хүлээж буй иргэдэд зориулан  20 минут үнэгүй интернет хэрэглэх wifi төхөөрөмж суурилуулах юм байна.
 Ажлын хэсгийнхэн энэ онд 69 автобусны буудал барих бөгөөд 31 буудлыг наадмын өмнө үлдсэнийг 8 сард багтаан ашиглалтад оруулахаар ажлаа эхэлжээ.