Зун цагийг илтгэх бас нэгэн өнгө бол цагаан өнгө юм. Харин цагаан өнгө нь  монголчууд бидний хувьд эхийн сайхан сэтгэл, аливаа сайн сайхан бүхний илэрхийлэл байдаг. Эрт дээр үед хаад ноёд, ихэс дээдэстээ хүндэтгэл үзүүлэх бол цагаан зүсмийн мал сонгох буюу есөн цагаан бэлэг өгдөг заншилтай байсан бөгөөд ялангуяа ийм зүсмийн бод мал тун ч их хүндэтгэл үзүүлсэнд тооцогддог байжээ. Улмаар төрийн ёслолд цагаан өнгийг оруулж “9 хөлт цагаан туг”-ийг тахихаас гадна, шинэ оны эхлэл хэмээн үзэж хаврын эхэн сарыг ч мөн “ цагаан сар”  хэмээн нэрлэдэг заншилтай.
    Гэвч энэ удаа цагаан өнгөний бэлгэдэлийг дурдахаас илүүтэй тус өнгөөр айл гэрийн дотоод тохижилтыг хэрхэн хийж болохыг харуулах зорилго бүхий хэд хэдэн зургийг хүргэж байна. Цагаан өнгө нь тогтвортой, итгэлтэй сэтгэл төрүүлдэг гэж сэтгэл судлаачид үздэг. Мөн цэвэрхэн, эмх цэгцтэй болгож харагдуулах нь бий.
   Орчин үед цулгуй цагаан хананаас татгалзах болсон ч тавилга, хэрэгсэлтэйгээ хослуулж чадвал тийм ч муу сонголт биш ажээ. Ялангуяа цагаан өнгийн модон шал, тавилга зэрэг нь ихэмсэг байдлыг илтгэнэ.