“Ландшафт” гэдэг нь тухайн газар нутгийн ургамлан бүрхэвч, гадаргуугийн тогтцоор илэрхийлэгдэх “байгалийн дүр төрх” хэмээн тодорхойлжээ.
        Өдгөө дэлхий даяар Европын хот, улсуудыг гайхалтай ногоон ургамал, байгууламжаараа алдартай гэдгийг мэдэх болсон. Тэгвэл баруун Европт хүний гараар бүтээгдсэн културландшафт, онгон байгалийн ландшафт гэсэн ойлголт байдаг ажээ. Хүн төрөлхтөн хөгжлийнхөө явцад байгаль орчноо танин мэдэж, түүнийг эзэмшихийн хажуугаар културландшафтыг  бий болгосон байна.
Өнөөдөр културландшафтийг  гарал үүсэл, чиглэл зорилгоор нь:
1.     Уран барилга, хот байгуулалтын үйл ажиллагаанаас үүдсэн хотын ландшафт
2.     Байгалийн баялгийг зүй зохистойгоор ашиглаж өөрчилсний дүнд үүссэн ойн аж ахуйн, усны аж ахуй, аж үйлдвэрийн,  хөдөө аж ахуйн ландшафт
3.     Хүмүүсийн амралт чөлөөт цагаа өнгөрүүлэхэд зориулж өвөрмөц орчинг уран сайхнаар хослуулан байгуулсан амралт зугаалгын ландшафт гэсэн 3 том зүйл ангид хувааж үздэг байна.
      Эдгээрээс өнөөдөр хотын ландшафтын талаар товчхон танилцуулъя.  Хотын ландшафтын бүтээлүүд нь архитектур, уран зураг зэргээс дутахааргүй тухайн үеийнхээ онцлогийг хадгалсан түүхийн гэрч,  соёлын өв, гайхамшигт дурсгал болсоор иржээ. Үүний баталгааг 17 зууны үед байгуулагдсан Францын алдарт  “Версалын  парк”, 16 зууны Италийн Тивали хот дахь ”Эсте” парк, Израйлийн “Бахай” парк  зэрэг дэлхийд гайхагдсан хосгүй  цэцэрлэгт хүрээлэн, ландшафтын олон арван бүтээлүүдээс харж болно.  
        Түүнчлэн Европт маш өргөн тархсан “Аллее” гудамжууд европын түүх соёлын салшгүй нэг хэсэг болсон байдаг. “Аллее” гэдэг нь Францаар “явах шугам” гэсэн үг бөгөөд зам дагуу тарьсан моднуудыг ийн нэрлэдэг.  Үүнийг Франц улс Наполеоны хаанчлалын үед  өргөнөөр барьж  байгуулжээ. 
      ХБНГУ-ын нийслэл Берлин хотын төвд л гэхэд  250 гаруй жилийн түүхтэй хэдэн зуун метр үргэлжлэх  гайхамшигтай Аллее гудамжууд  өнөөг хүртэл хотыг чимэглэж байдаг ба энэхүү түүхэн “Аллее” гудамжийг хамгаалах тал дээр хотын захиргаанаас маш их анхаарч ажилладаг.
         Харин манай улсад ландшафт бүрэн утгаар хөгжиж чадаагүй байгаа төдийгүй нийслэлийн гудамжинд хүний хараа булаах үзэмжтэй цэцэрлэгт хүрээлэн байгуулагдаж амжаагүй л байна. Ногоон байгууламжаа нэмэгдүүлэх бус хотын дотор, гадна талын моддоо тайрч сүйтгэсээр байгаа нь харамсалтай.
        Гэхдээ саяхнаас нийслэл хот дахь ногоон байгууламжийн асуудал хурцаар тавигдаж, түүнийг нэмэгдүүлэх замаар агаарын бохирдлыг бууруулахын тулд  нийслэл хотыг 2020 он хүртэл хөгжүүлэх ерөнхий  төлөвлөгөөнд нэг хүнд ноогдох цэцэрлэгжсэн талбайг 20м² хүргэх  зорилтыг  тавин ажиллаж байгаа гэсэн чихэнд чимэгтэй мэдээ дуулдах боллоо.
       Ингээд нийслэлийн ногоон байгууламжаа нэмэгдүүлж, гоёмсог өнгө төрхтэй болгоход санаа өгөхүйц хэдэн жишээ зургийг хавсаргаж байна.