Х.Жанчивдорж: Хэт өндөр бат бөхтэй бетон гарган авлаа
Барилга.МН сайт гадаад улс оронд барилгын чиглэлээр амжилттай суралцаад ирсэн, суралцаж байгаа залуучуудтай хийсэн ярилцлагыг хүргэдэг. Энэ удаагийн ярилцлaгаараа БНСУ-ийн Чонбук Үндэсний Их сургуулийн Барилга, Архитектур инженерийн сургуульд докторын зэрэг хамгаалсан Х.Жанчивдорж хэмээх залуутай онлайнаар ярилцлаа.
- Сургуулиа төгсөөд хаана ямар алба хашиж байсан бэ?
2005-2008 онуудад ШУТИС-ийн бүрэлдэхүүн Дарханы Технолoгийн сургуульд ажиллаж байсан.
- БНСУ-ийн Чонбук Үндэсний Их Сургуульд хэзээ элсэн орсон бэ?
2008 онд тус сургуулийн Барилга Архитектур Инженерийн Сургуульд докторантурт суралцахаар ирсэн.
- Суралцаж байх хугацаанд судалгааны ажлын зорилго юу байсан бэ?
Миний судалгааны зорилго бол үйлдвэрийн хаягдал (Sillica Fume, Fly Ash, Blast Furnace Slag)-уудыг дахин ашигласнаар хүрээлэн буй орчны бохирдлыг багасгаж мөн нэг куб метр бетонд зарцуулагдах цементийн хэмжээг бууруулснаар эдийн засагт хэмнэлттэй хэт өндөр бат бөхтэй бетон гарган авах ба түүний дотоод бүтэц болон галт тэсвэртэй чанарыг судлах зорилготой байсан.
- Хэт өндөр бат бөхтэй бетон гэж ямар ойлголт вэ?
Дэлхий нийтээр барилга болон зам гүүрийн бүтээц эдлэлд ашиглаж байгаа бетоныг бат бөхөөс нь хамаарч 18-40MПa энгийн, 40-70MПa өндөр бат бөхтэй, 70MПa-аас дээш бол хэт өндөр бат бөхтэй гэж ангилдаг.
- Тэгвэл таны судалгааны үр дүн ямар гарсан бэ?
Миний судалгааны ажил бол цоо шинэ ажил биш юм. Урьд өмнө энэ талаар Канад, Турк, БНХАУ, Тайван, Япон, БНСУ-ын судлаачид судалсан байдаг. Эдгээр судлаачид нь судалгаандаа төрөл бүрийн онцлог материалыг ашиглаж янз бүрийн бат бөхтэй урвалжих идвэхитэй нунтаг бетон гарган авсан байдаг. Урвалжих идвэхитэй нунтаг бетон гэдэг нь энгийнээр тайлбарлaвал нэг метр куб дэх цементийн агууламж нь 950-1000кг/м3 ба төмөрлөгийн үйлдвэрийн хаягдал болох силика фуми(silica fume) гэдэг хаягдал материалыг цементийн жингийн 25% хүртэл холиод, энгийн бетонд ашигладаг хайрга, дайрга огт хэрэглэхгүйгээр 0,5мм диаметрээс доош нарийн ширхэгтэй элсийг хэрэглэх ба түүнчлэн ган утас ашигладгаараа онцлог юм. Миний хувьд одоогоос дөрвөн жилийн өмнөөс эхлэн судалгаа маань эхэлсэн. Судалгааны үр дүнд цементийн зарцуулалтыг 750кг/м3 хүртэл бууруулж, арчилгааны төрлөөс хамaaрч 150-212MПa бат бөхтэй урвалжих идвэхитэй нунтаг бетон гаргаж авч чадсан.
- Энэхүү бетоны онцлог болон давуу талыг дурдвал?
Хэт өндөр бат бэхтэй бетоныг 100-аас дээш давхар бүхий өндөр барилгын сууринд, зам гүүрийн хийц эдлэл, алслал урттай гүүр, усан сан, нисэх онгоцны буух зам талбай мөн түүнчлэн онцгой төрлийн бүтээц эдлэлийг үйлдвэрлэхэд, янз бүрийн хүнд, химийн үйлдвэрээс гарч буй хог хаягдлыг хадгалах байгууламж ашиглах бүрэн боломжтой.
- Таны ярианд хэт өндөр бат бэхтэй бетоныг галд тэсвэртэй чанарыг судалдаг гэсэн. Яагаад заавал галд тэсвэртэй чанарыг судлах болсон бэ?
Ер нь хэт өндөр бат бөхтэй бетон төдийгүй 40MПa-аас дээш бат бөхтэй бүх төрлийн бетонийг ашигласан барилга байгууламж, хийц эдлэлд гэнэтийн гал гарсан тохиолдолд 400°С дээш халуун орчинд бетонд хагарал ан цав, нуралт үүсдэг юм. Тийм учраас урьдчилан сэргийлэх аргын талаар судалсан. Хэрэв барилга байгууламжид гэнэтийн гал гарсан тохиолдолд дотор байгаа хүмүүсийн аюулгүй байдалд маш ноцтой асуудал үүсэх мөн тухайн барилга байгууламжийг дахин ашиглах боломжтой эсэх талаар зайлшгүй асуудал үүснэ. Ийм учраас галд тэсвэртэй чанарыг судалсан юм.
- Галд тэсвэртэй чанарыг судалснаар ямар үр дүн гарсан бэ?
Барилгын онц ноцтой эвдрэлээс урьдчилан сэргийлэхийн тулд бидний хэлж заншснаар нийлэг утсыг бетондоо зохистой харьцаагаар хольж зуурч бэхжүүлэх юм. Гаргаж авсан бетоноо тусгай төрлийн шатаах зууханд 1000°С-д 2 цаг шатаасны дараа шахалтын бат бөх болон дотоод бүтцийн нүхжилтийг үзсэн. Шахалтын бат бөх нь галд шатаахаас өмнө 212MПa байсан бол 1000°С шатаасны дараа 70MПa хүртэл буурсан. Мөн түүнчлэн хагаралт нуралт үүсээгүй ч нягт байсан бүтэц нь ялимгүй нүхжилт үүссэнийг нарийн шинжилгээгээр тогтоосон. Энэ нь урвалжих идэвхитэй нунтаг бетоныг ашигласан барилга байгууламж хийц эдлэлд гэнэтийн гал гарсны дараа үүсэх аюулаас урьдчилан сэргийлэх тухайн хийц эдлэлийг дахин ашиглах боломжийг ихэсгэж байгаа юм.
- Манайд сүүлийн жилүүдэд өндөр барилгууд их баригдах болсон. Хэт өндөр бат бэхтэй бетоноо эх орондоо хэзээнээс нэвтрүүлэх вэ?
Хэрэгцээ шаардлага нь гараад үйлдвэрлэх нөхцөл бололцоо нь бүрдвэл эх орондоо энэхүү бетоныг үйлдвэрлэх бүрэн боломжтой гэж үзэж байна.
- Гадаадад суралцаж байгаа тул өөрт чинь манай сайтаар дамжуулаад хэн нэгэнд хандаж үг хэлэх боломж олгож байна.
ШУТИС-ийн Дархан-Уул аймаг дахь Технологийн сургуулийн Силикатын технологийн профессорын багийн доктор профессор Ч.Дэндэвдорж, С.Цэвэл, Ж. Амгалан, Ц.Батбаатар, Д.Оюунбилэг болон тэнхимийн нийт багш нартаа оюутны ширээнээс өлгийдөн авч гадаадын нэр хүндтэй их сургуульд суралцах үүд хаалгыг нээж өгсөн та бүхэнд баярласнаа илэрхийлье! Та бүгдийн минь ажил үйлс нь бүтэмжтэй, эрүүл энх, урт удаан наслаарай. Номын цагаан буян дэлгэрэх болтугай гэж хэлмээр байна.
1000 0C-д шатааж байгаа байдал
1000 0C-д шатааж байгаа байдал
