Засгийн газрын мөрийн хөтөлбөрийн хэрэгжилтийг сурталчлах зорилгоор салбарын яамдууд үйл ажиллагаагаа олон нийтэд таниулах нээлттэй өдөрлөгийг зохион байгуулсаар удаж буй. Өнгөрсөн амралтын өдрүүдэд БХБЯ-ны нээлттэй  өдөрлөг болдсон бөгөөд өдөрлөгийн үеэр салбарын сайд Ц.Баярсайхантай ярилцлаа.
-Өнгөрсөн 2 жилд БХБЯ-аас хийсэн ажлуудыг товч танилцуулахгүй юу?
-Бодлогын хүрээнд бид чамлахааргүй олон ажлыг хийлээ. 2012 онд шинэ Засгийн газраас яамдын бүтэц, зохион байгуулалтанд өөрчлөлт оруулснаар Зам тээвэр, барилга, хот байгуулалтын  яамыг салгаж Барилга хот байгуулалтын яам /БХБЯ/-ыг дангаар ажиллуулах болсон. Энэ яам бас  ч үгүй хүний өмнө хэлэх үгтэй, олон нийтэд тайлагнахаар хэд хэдэн бодот ажлыг хийсэн байна. Иргэдийг орон сууцжуулах бодлогыг шинээр тодорхойлж, 8 хувийн зээл олгож эхэллээ. Шинэ бүтээн байгуулалт хөтөлбөрийг боловсруулан Улаанбаатар хотод шинэ сууршлын бүс бий болгож, гэр хорооллыг өөрчилж эхлэх гэж байгаатай холбогдуулан өнгөрсөн жил орон сууцны шинэ хороолол, гэр хорооллын дахин төлөвлөлт хийж байгаа газруудад инженерийн шугам сүлжээ барих ажлыг хийлээ. “Буянт-Ухаа” хорооллын дэд бүтэц болоод БНСУ-ын газрын тусламжтайгаар Яармагийн усан хангамжийн системийг хийж дууссаныг иргэд маань сайн мэдэж байгаа байхаа. Түүнчлэн аймаг бүрт хот төлөвлөлтийн ажил явагдаж, мянган айлын орон сууц барихтай холбогдуулан инженерийн шугам сүлжээ барих ажил ид өрнөж байна. Тухайлбал энэ жил  Дархан-Уул, Орхон, Дорнод, Сэлэнгэ, Хэнтий, Өмнөговь аймгууд 2030 хүртэлх хөгжлийн ерөнхий төлөвлөгөөгөө шинээр боловсруулан ажиллаж байгаа. Ингэснээр орон нутагт орон сууц барих ажил нэлээд бодотой болж байгаа юм. Барилгын материалыг эх орондоо үйлдвэрлэж, гол нэр төрлийн бүтээгдэхүүний хэрэгцээг хангах зорилгоор  “Барилгын материалын үйлдвэрлэлийг дэмжих хөтөлбөр”-ийг Засгийн газраар батлуулан хэрэгжүүлж байна. 
Мөн Төрийн үйлчилгээний шат дамжлагыг бууруулах үүднээс барилгын ажлыг эхлүүлэхэд хуучин давхардсан тоогоор 102 гарын үсэг зуруулдаг байсныг цөөлөх зорилгоор  нэг цэгийн үйлчилгээнд шилжүүлжснээр 30-35 хоногийн дотор барилгын ажил эхлүүлэх, үргэлжлүүлэх зөвшөөрөл олгодог болсон. Тусгай зөвшөөрөл олгох эрхийг зарим төрийн бус байгууллагад шилжүүлсэн зэрэг ажлуудыг хийжээ.  Цаашид ч илүү сайжруулах ажлуудыг хийгээд явах юм.
Эрх зүйн хүрээнд барилгын норм дүрмийг боловсруулах, стандартыг боловсронгуй болгох ажлууд мөн хийгдээд явж байна.
-Тэгвэл салбарын яамнаас яг одоо барилгын улирал эхэлсэн энэ үед ямар ажлууд хийж байна вэ?
-Эдийн засгийг эрчимжүүлэх ажлын хүрээнд нэлээд олон ажлыг хийж эхэлсэн. Ялангуяа дэд бүтцийн ажлуудыг чамлахааргүй хийж байгаа. Барилгын салбарын ажил ид өрнөж байгаатай холбогдуулан аюулгүй ажиллагаанд анхаарч ажиллаж байна. Хэдийгээр мэргэжлийн хяналтын байгууллагаас хяналт шалгалт хийгээд явдаг ч тухайн компани дотоод хяналтаа сайжруулан ажиллах ёстой. Саяхан БХБ-ын сайдын тушаал гаргаж, нийслэл хот дахь өргөгч машин механизмуудад нэгдсэн шалгалт хийсэн бөгөөд техникийн аюулгүй байдал паспортжуулалт, шаардлагатай норм дүрмүүдийг гаргах үүднээс бид энэ ажлыг хийсэн.  Өргөгч машин механизмын холбоотой хамтарч уг шалгалтыг хийсэн юм.  Цаашлаад тус холбоотой  хамтран Улаанбаатар хотод ашиглагдаж байгаа лифт, барилга байгууламж дээрх кран, өргөгч машин механизмын аюулгүй ажиллагааг хангах үүднээс тодорхой ажлуудыг хийхээр төлөвлөж байна.
-Салбарын сайдаас асуухгүй өнгөрч боломгүй нэг зүйл байна. Саяхан УИХ-аас тогтоол гаргаж барилгын төсөвт өртөгтэй холбоотой 2 норм дүрмийг цуцлахыг үүрэг болгосон байсан.  Энэ тал дээр та ямар байр суурьтай байна вэ?
-Сүүлийн үед бүтээн байгуулалттай холбоотой хүндрэлүүд гарч байна. Жишээ нь УИХ-аас нэлээд олон обьектыг 0 дүнтэй баталсан. Сая “Үндэсний аудитын газар”-аас шалгаад 130-аад барилга байгууламжийн ажлыг эхлүүлэхээр болсон ч цаана нь  хөрөнгө оруулалт нь шийдэгдээгүй 300 гаруй обьект бий. Үүнтэй холбоотойгоор 2 жилийн өмнө батлагдсан Зам тээвэр, барилга, хот байгуулалтын сайдын барилгын төсвийн 18 болон 181 дүгээр тушаалыг хүчингүй болгохыг  шийдвэрийг УИХ-аас гаргалаа. Энэ нь зүгээр нэг шийдвэр гаргаад хүчингүй болгох зүйл биш юм. Барилгын үнэ бүрдэл төсвийн асуудал дээр Эдийн засгийн яам, Сангийн яам болоод манай яамнаас хамтарсан ажлын хэсэг гараад ажиллаж байна.  Дээрх 2 тушаалыг улам боловсронгуй болгох чиглэлээр л ажиллахаас бус хүчингүй болгох тухай асуудал байж болохгүй. Хүчингүй болгох нөхцөл нь ч бүрдээгүй гэж салбарын сайдын хувьд үзэж байна.