Нийслэл хот дахь авто машины захуудыг нүүлгэн СХД-т шилжүүлж, “Авто худалдааны цогцолбор” байгуулах тухай яриа ажил хэрэг болж, тус төвд арилжаа эрхлэх хүсэлтэй  иргэд, аж ахуйн нэгжид талбайн борлуулалт хийх ажил өрнөж байгаа билээ. Энэ сарыг дуустал өмнө нь авто машины худалдаа эрхлэж байсан иргэд, аж ахуйн нэгжийг бүртгэх бөгөөд төлбөрийн 100 хувь бэлэн төлөхийг санал болгож байгаа аж. Учир нь “Авто худалдааны цогцолбор” нь томоохон бүтээн байгуулалтын ажлыг шаардаж, барилга байгууламж гэхэд 17 барих шаардлагатай гэнэ. Түүнчлэн Улаанбаатар хотыг хөгжүүлэх ерөнхий төлөвлөгөөний дагуу уг цогцолборын хажууд 15 мянган айлын орон сууцны барилга барьж ашиглалтанд оруулах юм.
      Харин уг цогцолборт авто машин борлуулах хүсэлтэй иргэд, аж ахуй нэгжээс төлбөрийг нь 100 хувь авч байгаатай холбогдуулан “Авто худалдааны цогцолбор” төрийн өмчит аж ахуйн тооцоот үйлдвэрийн газраас “Зээлийн батлан даалтын сан”, тус сантай хамтран ажилладаг арилжааны банкуудтай гурвалсан гэрээ байгуулан ажиллаж байгаа юм байна.   Ингэснээр  авто зогсоолыг худалдаж авах иргэдэд банкны зээлд хамрагдах, барьцаа хөрөнгийг Зээлийн батлан даалтын сан даах ач холбогдолтой хэмээн уг цогцолборын удирдлагууд үзэж байгаа аж. “Авто худалдааны цогцолбор”-ын талбай 4-9 сая төгрөгийн үнэтэй юм.