“Үндэсний цэцэрлэгт хүрээлэн” сүүлийн үед нийслэлийнхний очих дуртай газрын нэг болоод байгаа билээ. Энэ газар тун удахгүй бас нэгэн сонирхол татахуйц нэгэн хэсэг бий болох нь. Учир нь  Улаанбаатар хот байгуулагдсаны 375 жилийн ойг угтан, нийслэлийн Захирагчийн ажлын алба, Нийслэлийн Ерөнхий төлөвлөгөөний газар урлагийн байгууллагуудтай хамтран  орон зайн урлаг буюу дүрслэх урлагийн наадмыг тун удахгүй зохион байгуулах бөгөөд шилдэгээр шалгарсан бүтээлүүдийг “Үндэсний цэцэрлэг хүрээлэн”-д байршуулахаар зэхэж байгаа юм байна. Тус наадам цаашид жил бүр уламжлал болон зохиогдох ч энэ удаагийн наадамд уран баримлын шилдгүүдийг шалгаруулах учир “Улаанбаатар уран баримал” нэрлэжээ. Иймд наадамд оролцож, бүтээлээ ирүүлэх хүсэлтэй уран барималчид, архитекторчдыг өнөөдрөөс эхлэн бүртгэж байгаа аж. Зохион байгуулагчид өнөөдөр сэтгүүлчдэд наадмынхаа талаар танилцууллаа.
Манай улсын уран бүтээлчид гадаадын томоохон тэмцээн уралдаанд амжилттай оролцож байгаа ч өөрийн оронд өрсөлдөх боломж хомс байгааг юуны өмнө анзаарч эх орорндоо шилдэг санааг нь авч үлдэхийг эрмэлзэж байгаа гэнэ. Үүнээс гадна уран баримал, хөшөө дурсгал хотын өнгө зүс, тохижилтонд нөлөөлж байдаг урлагийн томоохон бүтээл юм. Мөн гоёмсог баримлууд жуулчдыг татах эх үндэс болдог байна. Иймд нийслэл хотын өнгө үзэмжийг сайжруулах зорилгыг ч давхар агуулж байгаа бөгөөд уран бүтээлчдийн бүтээлч сэтгэлгээг урамшуулан дэмжих, нийслэлийн иргэдийн сэтгэл ханамж тав тухыг нэмэгдүүлэх, нийслэлд үгүйлэгдэж буй чимэглэлийн жижиг баримлын төрлийг хөгжүүлэх зорилготой гэнэ.       Наадамд урлагийн байгууллагууд, чөлөөт уран бүтээлчид, сонирхогчид болон оюутан сурагчид багаар мөн бие даан оролцох боломжтой. Оролцогчид чөлөөт сэдвийн дор баримлын бүх төрлийн материалыг ашиглан  оролцож болох юм. Зохион байгуулагчдын зүгээс бүтээлд дараахь шаардлагыг тавьж байна.
 Наадамд оролцох уран бүтээлчдийн бүтээл нь:

Оролцохыг хүссэн уран бүтээлч, иргэдийн бүтээлийн эх загварыг 2014 оны 06 сарын 23-ны 12 цаг хүртэл Хангарьд ордны 6 давхарт Улаанбаатар хотын Захирагчийн ажлын албаны Тохижилт, хог хаягдлын удирдлагын хэлтсийн 609 тоотод хүлээн авна.
 
Харин зохион байгуулалтын хувьд оролцох бүтээлүүдийн эх загварыг ажлын хэсэг дээр урьдчилан хүлээн авч шилдэг 30 бүтээлийг шалгаруулан наадамд оролцуулна. Нэг баг, уран бүтээлч хэдэн ч загвар ирүүлж болох бөгөөд бүтээлийн эх загварыг 40 см хэмжээтэй байхаар, 3 хэмжээст программд оруулан танилцуулах хэлбэрээр хүлээн авна. Загвартай хамт бүтээлийг бодитоор хийх хэмжээ, материалын зардал, бүтээлийн агуулга тайлбар, уран бүтээлчийн тухай товч танилцуулга зэргийг хавсарган ирүүлнэ.
Наадамд шалгарсан загварыг 2014 оны 06 дугаар сарын 24- нд  олон нийтэд танилцуулах бөгөөд шилдэг бүтээлийг Үндэсний цэцэрлэгт хүрээлэнд 2014 оны 07 дугаар сарын 05 наас 14-ний өдрүүдэд бүтээн байршуулна.
 
Үндэсний цэцэрлэгт хүрээлэнд бүтээгдсэн бүтээлүүдээс шилдэг 3 бүтээлийг  шалгаруулж тус бүр дурсгалын цом, 5 сая төгрөгөөр шагнаж урамшуулах юм байна.