Сүүлийн хэдхэн жилийн дотор нийслэлийн барилгажилт эрчимжиж, Улаанбаатар хот хүрээгээ улам бүр тэлсээр. Гэвч сайны хажуугаар саар гэгчээр энэ олон барилгын дотор асуудал дагуулсан “хулгайн” бүтээн байгуулалт ч их бий. Үүний нэг жишээ нь Баянгол дүүргийн 6-р хороонд Дако компаний орон сууцны барилгын хажуу бөөрөнд наалдах шахам баригдаж буй иргэн н.Болдын гэх тодотголтой 5 давхар үйлчилгээний барилга юм.
       Орчин цагт мөнгө, эрх мэдэл,  танил талтай л бол Улаанбаатар хотын хаа хүссэн байршилд газрын зөвшөөрөл гаргуулж, чигжиж чихээд л барилга барих болсон. Үүнийг нь өөгшүүлдэг, хэдэн төгрөг атгаад нүдээ аниад өнгөрдөг төрийн албан хаагчид  ч олширсон нь харамсалтай. Айлуудын цонхыг хааж үзэгдэх орчин, байгалийн гэрэл үзэх эрхийг хамтад нь хязгаарлаад зогсохгүй оршин суугчдын орон зайн аюулгүй байдлыг алдагдуулсан ийм нэгэн эзлэн түрэмгийлэгчийн барилга өнөөдөр баригдаад дуусах гэж байна.
      Тус барилгын ажил өнгөрсөн оны 9 дүгээр сараас эхэлсэн бөгөөд Дако компаний орон сууцны оршин суугчид баригдаж эхэлсэн цагаас  Нийслэлийн Засаг дарга, Мэргэжлийн хяналтын газар гээд холбогдох албан тушаалтан, төрийн байгууллагад гомдлоо гаргаж, эсэргүүцлээ илэрхийлсээр ирсэн ч өдийг хүртэл аль ч газраас ямар нэг шийдвэр гараагүй, өнөөх барилга нь ч баригдаад дуусаж буй. “Хот тосгоны барилгажилтын норм ба дүрэм 31-01-40”-д  2-3 давхар сууцны барилгын тууш талуудын хоорондын зай 15 метрээс багагүй, 4 давхар бол 20 метрээс багагүй байх ёстой гэж заасан. Гэтэл энэ хоёр барилгын зай 2 метр ч хүрэхгүй, дээрээс нь уг үйлчилгээний барилга нуранги хөрстэй далан дээр баригдаж байгаа учир газар хөдлөлтөнд тэсвэргүй, жаахан чичэрхийлэл үүсэхэд л нурах аюултай. Нуранги сул хөрстэй  далан дээр барилга барихыг хориглосон хуулийн заалт ч бий.
       Иргэн Болдын гэх тухайн барилгын талаар Нийслэлийн ерөнхий төлөвлөгөөний газраас тодруулахад барилгын ажлын зөвшөөрөл олгоогүй гэсэн хариу өгсөн бөгөөд Нийслэлийн мэргэжлийн хяналтын газрын Барилгын техникийн хяналтын улсын байцаагч Ц.Алтансүх иргэдийн гомдлын дагуу ирж шалгасан хэдий ч одоог хүртэл барилгын ажил зогсоох тухай акт гаргахгүй, харин ч зөвшөөрлөө яаралтай гаргуулахыг зөвлөөд буцсан байна. Ц.Алтансүх байцаагчтай уулзахаар ажил дээр нь хэдэн удаа очиж хоосон хаалга мөргөсний эцэст утсаар холбогдож лавлахад уг барилгыг ажлаа зогсоохыг шаардсан албан тоот хүргүүлсэн, акт гаргаагүй, хэрвээ барилгын ажлаа үргэлжлүүлсээр байгаа бол шүүхэд асуудлыг шилжүүлнэ гэлээ.
       Харин нар үзэх эрхээ хасуулсан оршин суугчид аргаа барж шүүхэд нэхэмжлэл гаргахаар болжээ. Өр зээл тавин байж арайхийн амьдрах орон байртай болтол хамаг цонхыг нь таглаад өөр нэг барилгын хана босгочихоор ямар олиг байхав дээ. Бусдын амгалан тайван байдлыг алдагдуулж, эрүүл, аюулгүй орчинд амьдрах эрхийг нь хязгаарлаад байгаа бүлэг хүмүүс өөрсдөө ч бас ийм хүнд байдалд орохыг хүсэхгүй нь лавтай. Бусдын эрх ашгийг хөсөр хаясан эзлэн түрэмгийлэгч “хулгайн” барилгуудаа хууль дүрмийнх нь дагуу бушуухан цэгцлээсэй дээ.