Улаанбаатар хотод 212 км авто зам шинээр барих, 350 км авто замыг  өргөтгөн шинэчлэх ажил Засгийн газрын болон Нийслэлийн Засаг даргын 2012-2016 оны мөрийн хөтөлбөрт тусгагдсан. Замын хөдөлгөөний ачааллыг бууруулж, шинэ суурьшлын бүс бий болгоход чиглэсэн уг зорилтын дагуух бүтээн байгуулалтын зарим ажил энэ оны төсөвт "0.00" дүнтэй батлагдсан юм. Засгийн газрын өнөөдрийн хуралдаанаар нийслэлд эрх шилжсэн, эх үүсвэр тодорхойгүй байсан нэр бүхий дөрвөн төсөлд шаардлагатай 28,6 тэрбум төгрөгийг “Хөгжлийн банк”-аар дамжуулан санхүүжүүлэхээр шийдвэрлэлээ. Энэ нь

- Яармагийн гүүрээс Нисэхийн товчоо, Сонсголонгийн замын уулзвараас Яармагийн товчоо хүртэлх 13.7 км авто замын өргөтгөл, шинэчлэлт
- Шарга морьт-Жигжидийн уулзвараас Гүнтийн даваа чиглэлийн 5 км авто зам
- МТ-ийн шатахуун түгээх станцын уулзвараас Хайлаастын эцэс хүртэлх 3.1 км авто замын өргөтгөл шинэчлэлт 
- Нисэхийн товчоо-Биокомбинат-Шувуун фабрик чиглэлийн 22.5 км авто замын өргөтгөлийн ажил юм.

Харин энэхүү олгосон зээлийн 20 тэрбум төгрөгийг хүүгийн төлбөрийн хамт ирэх оны улсын төсөвт, 8,6 тэрбум төгрөгийг хүүгийн төлбөрийн хамт мөн оны нийслэлийн төсөвт тусган “Хөгжлийн банк”-нд буцааж олгохоор тотсон байна.