Эмгэнэл

Монгол Улсын Гавъяат барилгачин, зөвлөх архитектор, Монголын Архитекторуудын Эвлэлийн ахмад гишүүн Долгоржавын Сайн-Эр 2014 оны 7 сарын 16-ны өдөр зуурдаар таалал төгсч, архитектор, зураг төсөл зохиогчдод хүнд гарз тохиолдлоо. 
Д.Сайн-Эр 1938 оны 4 сарын 10-ны өдөр Өмнөговь аймгийн Гурвантэс сумын нутагт төрж, нийслэлийн арван жилийн З дугаар сургуулийг төгсч улмаар Бүгд Найрамдах Социалист Чехословак Улсын Брно хотын Техникийн их сургуульд сурч архитектор мэргэжил эзэмшсэн юм. 
Д.Сайн-Эр 1965 онд Барилгын зургийн улсын институтэд орж, ажил хөдөлмөрийн гараагаа эхэлж, архитектор, групп, товчооны ерөнхий инженер, дарга, Улсын барилгын зургийн төв институтын захирал, 1986 оноос Дархан хотын АДХ-ын гүйцэтгэх захиргааны орлогч дарга бөгөөд Дархан хотын Ерөнхий архитектор, 1992 оноос БХБЯ, ДБХЯ-нд эксперт, газрын дарга, 1998 оноос Хот байгуулалт-ТӨҮГ-ын захирал, 2006 оноос Шинэ хотжилт ХХК-ны захирлаар тасралтгүй ажиллаж байлаа.
Д.Сайн-Эр 1965 онд Монголын Архитекторуудын Эвлэлд гишүүнээр элсч, өөрийн оронд орчин үеийн архитектур-хот байгуулалтыг хөгжүүлэх, ялангуяа Монгол орны хот, суурингийн ерөнхий төлөвлөгөө, муж төлөвлөлт, хүн амын нутагшил суурьшлын схем боловсруулах, зураг төслийн байгууллагыг бэхжүүлэхэд өөрийн мэдлэг, авъяас билгээ зориулан хөдөлмөрлөж байв. Тэрбээр өөрийн оронд болон гадаад орнуудад зохиогдсон хурал зөвлөгөөнд Монгол орны архитектур, хот байгуулалтын талаар илтгэл тавьж, нийтлэлүүд бичиж байсан болно.
Д.Сайн-Эрийн ажил хөдөлмөрийг төр, засгаас өндрөөр үнэлж, 2006 онд Монгол Улсын Гавъяат барилгачин цол хүртээсний зэрэгцээ , Алтан гадас одон, Чингис хааны одон, Хөдөлмөрийн хүндэт медаль, Ардын хувьсгалын ойн медалууд, Германы Эрнест Шнейлерийн медаль, таван жилийн гавшгайч, Тэргүүний барилгачин цол тэмдэгээр шагнаж, Монгол Улсын зөвлөх архитектор зэрэг дэв хүртжээ.
Д.Сайн-Эрийн ажилч хичээнгүй, найрсаг сайхан зан чанар, хийж бүтээсэн бүтээлүүд нь архитектор, зураг төсөл зохиогчид бидэнд мөнхөд дурсагдан үлдэх болно. Талийгаачийн хань, үр хүүхэд, төрөл төрөгсдөд нь гүн эмгэнэл илэрхийлье.
 

                                                              Монголын Архитекторуудын Эвлэл