Баянзүрхийн товчооноос Богд уулын араар Яармагийн гүүр хүрэх 17.6 км авто зам барих ажлыг "ЭСТО" ХХК  өнгөрсөн оноос эхлэн гүйцэтгэж байгаа билээ. Зайсангийн уулзвараас зүүн тийш “Скай ресорт” хүртэл 10 км замын суурь хучилтыг хийж дуусган саяхан нээснээр баяр наадмын өмнө Богд уулын арын замаар тээврийн хэрэгслийг чөлөөтэй нэвтрүүлж эхэллээ. Энэ хэсэгт наадмын дараа өнгө хучилтын ажлыг хийх юм байна. Харин Зайсангаас баруун тийш үргэлжлэх замын суурь ба өнгө хучилтыг 8 дугаар сарын 01-нээс өмнө хийж хүлээлгэж өгөх гэрээний дагуу ажиллаж буй гэнэ. Богд уулын арын зам нь огцом эргэлт ихтэй тул туузан хашлагыг ч мөн хийхээр төлөвлөжээ. Хотын зүүн хэсгээс төв замд ачаалал өгөхгүй байхаар тооцоолж хийсэн Яармаг-Нисэх чиглэлд шууд нэвтрэх энэ замыг "ЭСТО" компанийн замчид гурван бригадаар, 24 цагт хоёр ээлжээр барьж байгуулж байгаа юм байна.