Үндэсний их баяр наадмыг зохион байгуулах хорооны даргаар томилогдсон Шадар сайд Д.Тэрбишдагва наадмын бэлтгэл ажилтай өнгөрсөн долоо хоногт танилцаж, засвар үйлчилгээг  энэ сарын 7-ны өдөр дуусгахыг үүрэг болгосон билээ. Өнөөдрийн байдлаар Төв Цэнгэлдэх хүрээлэнгийн үзэгчдийн суудал солих ажил хараахан дуусаагүй байсан бөгөөд нийт 12 мянган суудал шинээр суурилуулахаас 4500 нь бэлэн болсон байна. 55 жилийн дараах энэхүү шинэчлэлд зөвхөн талбайн сандал суудлыг солиод зогсохгүй гадна, дотно засал чимэглэлийг давхар анхаарч буй юм. Нийтэд нь шинэчлэн засч өөрчлөөгүй ч  хүрээлэнгийн төв оффисийн барилгын гадна өнгийг сэргээн, 16 хаалгыг будаж өнгөлжээ. Мөн бие засах газрын орчныг шинэчлэн, гадна талбайн өө сэвийг янзалж, машины зогсоолын тэмдэг тэмдэглэгээг сэргээсэн байна. Ер нь бол засварын ажлыг энэ долоо хоногийн сүүлчээр дуусгахаар төлөвлөсөн бөгөөд үйлчилгээний зохион байгуулалтын ажлыг баяр наадмын өмнөх өдөр НЗДТГ-аас хийнэ хэмээн Нийслэлийн тохижилт үйлчилгээний салбар хорооны ажлын хэсгийнхэн хэлсэн.
       Зөвхөн Төв Цэнгэлдэх хүрээлэнгийн тохижилтын ажлыг анхаараад зогсохгүй Хүй долоон худагийг наадмын төв болгох бүтээн байгуулалтыг өнгөрсөн жилээс эхлүүлсэн билээ. Энэ жил үргэлжлүүлэн 500 автомашины зогсоол барих ажил дууссан бөгөөд нийтийн бие засах газар, явган хүний зам талбай зэргийг нэмж байгуулж байна. Давааны өртөөнөөс морь барианы талбай хүртлэх 2,3 км зам барих ажил мөн дуусч,   “Эко” автобусаар үйлчлэхэд бэлэн болжээ. Харин  автозогсоол болон үйлчилгээний талбайг морь барианы газартай холбосон засмал зам барих ажил одоогоор хийгдэж байна. Энэ жилийн баяр наадмын зохион байгуулалт, талбай байрн тохижуулалтын ажилд НЗДТГ-аас чамгүй анхаарал тавьж байгаа ч наадамчдын ая тухыг хангах тухайлбал үзэгчдийн суудалд нар, борооноос хамгаалсан саравч барьж байгуулах асуудлын талаар яригдаж байсан ч мөнгө санхүүгийн нөхцөл байдлаас шалтгаалж энэ жилдээ боломжгүй хэмээн холбогдох албаны хүмүүс үзжээ.