Зун боллоо... Бороо зөөлөн шивэрч заримдаа ширүүсч... /тэнгэр дуугарна,/ борооны дараа солонго татах нь үзэсгэлэнтэй ч түүнээс сайхан нь газрын үнэр үнэртэж цээж дүүргэнэ. Нялх ногоо газрын хөрс рүү яаран тэмүүлнэ. Тэмүүлэл энэ бол амжилт, аз жаргал, ухаарлын үндэс... Танай гэр бүл оршин буй орчиндоо аз жаргалтай амьдрахын үндэс магадгүй бяцхан ч байж болох ногоон байгууламж, цэцэглэгт хүрээлэн. Та хаана ч амьдардаг байж болно. Танд тэмүүлэл хэрэгтэй. Хашаанд ч бай, уудам цэлгэр талбайд ч бай ногоон байгууламж, цэцэглэгт хүрээлэнг бий болгоход зөвхөн сэтгэл, тэмүүлэл хэрэгтэй.
Өөрийн гараар цэцэрлэгт хүрээлэнгээ бүтээхэд дараах зүйлсийг анхаарах хэрэгтэй.
1-р Алхам
      Гадна тохижилт хийх талбайн хэмжээ, шоо дөрвөлжинг /м²/ зөв гаргана.
2-р Алхам
     Гадна тохижилт хийх талбайдаа төлөвлөлтийн зураг хийнэ. Хамгийн гол нь өөртөө ойлгомжтой байдлаар... Тэгээд доорхи асуултуудад хариулна.

Дээрх асуултанд хариулж, нарийн хэмжээ бүхий зураг дээрээ байрлуулсаны дараа та ерөнхий төлөвлөөний зурагтай боллоо гэсэн үг. Та аль болохоор нухацтай бодож ажил хэрэгч байдлаар хандаарай... Уран сэтгэмж, давтагдашгүй хэлбэр хийцийг ч та гэр бүлийн гишүүдийн хамтаар гаргаж болох юм.
3-р Алхам
      Явган зам тавихдаа 10х20-ийн даацын хавтан, 20х20, 30х30 гэх мэт төрөл бүрийн хэмжээ, өнгө бүхий хавтангаар, хүссэн хэмжээгээрээ зүсүүлээд байгалийн боржин чулуугаар, эсвэл зүгээр бүр өөр материал ашиглаж ч хийж болно. Энэ бол таны уран сэтгэмжээс шалтгаална. Явган замын бродюраа тавьсаны дараа угаасан хайргаар ч дүүргээд зам болгож болох юм. Орчин цагт ландшафтын чиг хандлага зөв хэмжээнээс татгалзах болсон. Тахир, муруй сонин содон хэлбэр хийц бүхий зам талбай болон гадна тохижилтыг хүмүүс илүүтэй таашаах болсон.
 

       Гэрэлтүүлэг хийхдээ хамгийн сайн даац бүхий цахилгааны утсыг сонгож холболтоо хийх нь аюулгүй байдлын хамгийн зөв шийдэл болно.
       Зүлэг тарихдаа олон наст үрийн сонгож хэрэглнэ. Мөн зүлэг тарьсаны дараа арчилгаа тордолгоог маш сайн хийж байх шаардлагатай. Жишээ нь: Усалгаа, тайралт. Цэцгийн мандал байгуулахдаа үрээр тарьж болно эсвэл үрсэлгээ худалдаж аваад суулгаж болно.
       Ногоон байгууламжийг төлөвлөж бүтээхдээ түүний талбайн хэмжээнээс гадна ойг бүрдүүлэх ургамал, бут сөөг, модны зүйлийн бүрдлийг анхааран үзэж сонголтыг хийх шаардлагатай. Жишээ нь: Туулайн бөөр, Дал мод, Хар улиас нь хар тугалгыг сайн шингээдэг байхад Улиангар, Агч, Гацуур зэрэг мод нь нүүрстөрөгчийн дутуу ислийг (С0₂) сайн шингээх ба Улиас, Бургас, Агч мод нь агаарын тоосжилтыг багасгана. Арц, Монос нь агаар дахь өвчний нянг устгах чадвартай бодис ялгаруулдаг гэх мэт онцлогтой байхад хотын төв хэсгийн гудамж талбайд гоёл чимэглэлийн мод сөөг тарьдаг.
Танд зөвлөхөд ургалт нь бага ч өвөл зундаа өнгөө хувиргадаггүй ногоон байх гацуур, нарс, арц сонгоорой гэж зөвлөх байна.
       Гоёлын бут сөөгний хувьд Монос – Мойл жимс ургадаг, цагаан цэцэгтэй, бактер устгах өндөр чадвартай. Гүйлс, Буйлс – Усан ягаан гоёмсог цэцэгтэй, навчлахаасаа өмнө цэцэглэдэг. Голт бор – Ягаан цэцэгтэй, Сарнайн бут – Улаан, Шар, Ягаан гэх мэт сарнай ургадаг бутлаг ургамал бол Тэхийн шээг – Намар навч нь гоёмсогоор улайж хатдаг өргөстэй сөөг юм.
Жисмний мод, бут, сөөгний хувьд Чацаргана, Алимны мод, Буйлс, Өрөл, Үхрийн нүд, Нохойн хошуу гэх мэт байж болно.
       Бут, сөөгний ургалт хурдан байдаг тул 3-5 жилийн дотор таны сэтгэлийг баясгаж танай бяцхан цэцэглэгт хүрээлэнг чимэхийн зэрэгцээ жимсээ өгөөд эхлэх болно. Таны тэвчээр, тэмүүлэлээр услагдан ургасан мод, бут таны үргэжлэх амьдралыг өнгө гэрлээр сүлэх болно.
Амьд хашлага
      Амьд хашлагыг хайлаас, шархуйсаар 30 см гүн, 20 см өргөнтэй шуудуу татан хийх нь илүү тохиромжтой бөгөөд таны цэцэрлэгт хүрээлэнг чимэх болно.
 

      Та өөрийн цэцэглэгт хүрээлэндээ нэр өгч болох юм. Жишээ нь: “Амжилтын цэцэрлэгт хүрээлэн”. Та ерөнхий төлөвлөгөөний сайн зураг гаргасан бол таны бодлоо чилээж сэтгэлээ шингээсэн “Амжилтын цэцэрлэгт хүрээлэн” бага багаар хөгжсөөр 1-3 жилийн дотор та гэр бүлийнхнийхээ хамт гэрийнхээ гадаа горхины чимээ сонсож, сүүдрэвчны доор сууж нүд, сэтгэлээ баясгах болно. Их ажлын дараа гэрийнхээ гаднах “Амжилтын цэцэрлэгт хүрээлэн”-ийнхээ моддыг услаж, бут сөөгөө хэлбэржүүлэн засч, жимсийг нь ч түүж, зүлэгээ тэгшлэх нь танд, таны гэр бүлд сайхан амралт байх болно.
      Цэцэрлэгжилтийг ямар зориулалтаар хийхээ ч сайн бодолцсон байх шаардлагатай. Энд хэдэн янзын хувилбар байж болох юм. Үүнд:
1. Дан төрөл бүрийн модоор хийх
/навчит ба шилмүүст мод/
2. Төрөл бүрийн мод, чимэглэлийн бут сөөгнүүд
/Өрөл, Нохойн хошуу, Монос, Голт бор,
Долоогоно гэх мэт/
3. Дан жимсний бут сөөгөөр цэцэрлэгжилт хиих
/Үхрийн нүд, Чацаргана, Монос, Гүзээлзгэнэ, Бөөрөлзгөнө, Тошлой, Давжаа алим гэх мэт/
4. Дан ургамлан хашлага хийх
/Шар хуайс, Хайлаас, Тэхийн шээг, Боролзгоно гэх мэт/
5. Ургамлан хашлага, чимэглэлийн бут сөөгтөй хийх
/Хайлаас, Шар хуайс, Өрөл, Монос,
Нохойн хошуу, Чацаргана, Үхрийн нүд гэх мэт /
6. Ургамлан хашлага
/Хайлаас, Шар хуайс, гэх мэт зүлэгтэй/
7. Цөөхөн навчит болон шүлмүүст модтой
зэрэг олон хувилбар байж болох юм. Энэ бүгд хувилбарын   алийг нь ч сонгон зөв зохистой харьцаагаар таривал хашаа сайхан харагдана. Ер нь хашаандаа ногоон байгууламж хийхдээ зорилгоо зөв тогтоох нь чухал юм. Жишээлбэл:
- Жимсийг нь амьдрал ахуйдаа ашиглана гэвэл 3-р хувилбарыг,
- Хэрвээ чөлөөт цагаа модны сүүдэрт өнгөрүүлэхэд зүгээр гэж бодвол 1-р хувилбарыг
- Хашаа нь хавар болон зундаа төрөл бүрийн цэцэгтэй намартаа өнгө алагласан навчтай байлгая гэвэл 2-р хувилбарыг,
- Харин хашаа цэлгэр ногоон хивс шиг тэгээд эргэн тойрон ургамлаар хамгаалагдсан байх нь сайхан гэж бодвол 6-р хувилбарыг тус тус сонгох боломжтой. Хүн хүний сонирхол өөр өөр байдгаас дээрх хувилбаруудыг санал болгож байна.
      Цэцэрлэгжүүлэх ажлыг гүйцэтгэхдээ цаг хугацааг нарийн баримтлах шаардлагатай.
Манай орны хувьд хавар, намар гэсэн хоёр улиралд цэцэрлэгжүүлэх ажлыг хийдэг. Хавар модлог ургамлын нахиа хөөж задрахаас өмнө буюу 4-р сарын дунд үеэс, 5-р сарын 20 хүртэл буюу cap орчим хугацаанд, намар мод сөөгний ургалт зогсож тайван байдалд орсон үеэс хойш буюу 9-р сарын сүүлчээс газар хөлдөж ажил хийх боломжгүй үе хүртэл тарьж суулгах шаардлагатай. Энэ нь зүгээр нэг тогтоосон хугацаа биш хөрс, агаарын гэсэлт, дулааралт, цаг агаарын тогтвортой нэмэх хэмд орж тогтворжсон байдал зэрэг олон талыг харгалзан тогтоосон хугацаа юм.
      Ногоон байгууламжийг чимэглэдэг зүйл нь зусах, өвөлжих цэцгээр элдэв хээ гарган өнгө алаглуулан хийсэн цэцгийн мандал юм. Цэцгийн мандлын зориулалтын талбайг хээрийн олон наст цэцэг ашиглан нэг удаа чанартай өнгө хослуулан хийж чадвал жил бүр хүч хөдөлмөр зарахгүй сайхан тохижилт болдогийг анхаарах бизээ.
 

       Ногоон байгууламжийн ажил хүнээс уйгагүй ажиллагаа шаардах бөгөөд цалгар назгай байдлаар хандвал хохирол амсаж болзошгүй тул эхнээс нь нягт нямбай байдлыг эрхэмлэх нь чухал байдаг. Хүн хийх тутам шинэ санаа төрж, ахин хийх хүсэл төрдөг нь хамгийн сайхан юм.

 
НОГООН НИЙСЛЭЛИЙГ ХАМТДАА БҮТЭЭЕ. Таны, танай гэр бүлийн “Амжилтын цэцэглэгт хүрээлэн”-нд АМЖИЛТ ХҮСЬЕ.