Америкийн хамгийн алдартай барилгууд нэгэн эрхмийн нэртэй холбоотой байдаг. Барилгын хэлбэр төрхийг гадаад байгальтай нь хослуулах анхны санааг гаргасан гэгддэг алдарт архитектурч Прэнк Лиод Райт мянга гаруй барилгын дизайныг гаргаж, хэдэн мянган барилгын дотоод заслын загварыг санаачилж, энэ чиглэлийн 20 гаруй сурах бичиг бичиж үлдээжээ. 19-р зууны сүүлийн хагаст төрж 20-р зууны эхэн үед бүтээлүүдээ туурвиж байсан энэ хүний нэр алдар, хийсэн бүтээл өнөөг хэр нь архитектурын салбарт голлох байр суурийг эзэлсээр байгаа нь түүнийг энэ салбарын ноён оргилын нэг байжээ гэдгийг илтгэнэ.
        Ингээд  Прэнк Лиод Райтын  хамгийн алдартай хоёр бүтээлийг танилцуулья. Эхнийх нь Америкийн Пеньсилван мужид байрлах Хүрхрээ /falling water/ нэртэй барилга юм. Энэ бүтээл нь барилга байгууламжийг гадаад байгалийн өнгө төрхтэй хослуулсны сонгодог жишээнд тооцогддог. Нэгэн их дэлгүүрийн эзний хүүгийн өөрийн эцгийн гэгээн дурсалд зориулж дахин давтагдашгүй басхүү гайхамшигтай зүйл бүтээх хүслээс үүдэлтэй энэ барилга үнэхээр ч үүргээ гүйцэтгэж чаджээ. Хүү хүслээ багшдаа хэлж багш нь түүний санааг дэмжиж хүний гараар бүтээсэн нэгэн гайхамшигт хүрхрээ, сонирхолтой барилгыг бүтээсэн байдаг. Борооны дуслуудыг өөртөө хуримтлуулах хэд хэдэн сувгуудыг эхэлж бариад эдгээр сувгийн ус нэг хоолойд цугларч барилгын дундуур  урсан өнгөрөхөөр зохиомжлогдсон нь үнэхээр үзэсгэлэнтэй харагдуулдаг. Мөн ус хуримтлуулах сувгийг яг усан сан хэлбэртэй барьж, барилгын нэгэн хэсэг мэт зохицуулсан бөгөөд эдгээрийг тойроод тухлан суух сандал байршуулж өгсөн нь бяцхан цөөрмийн эрэгт сууж буй мэт сэтгэгдлийг төрүүлдэг байна. Өргөн том цонх, гадна талын гэрэлтүүлэг зэрэг нь тухайн үедээ барилгын салбарт бас нэг нээлт байжээ. 1937 онд бүрэн баригдаж дууссан энэ барилга өнөөг хэр нь хүмүүсийн очиж үзэх дуртай газрын нэг байсаар байна. Харин барилгыг баригдаж дууссаны дараа захиалагч их дэлгүүрийн эзний хүү багш Прэнк Лиод Райттай учруулсан бурхан тэнгэрт талархалаа илэрхийлсэн байдаг.
 

 

         Ноён Райтын нэрээр үлдсэн бас нэгэн барилга эдүгээ далан насыг хүрэх гэж байна. Энэ бол дэлхийн сонгодог уран зургийн эх бүтээлүүдийн цуглуулга болсон алдарт Гүгенхемын музейн барилга юм. Америкийн ган төмөрлөгийн үйлдвэрийн салбарын томоохон төлөөлөгч Соломон Гүгенхем өөрийн цуглуулсан уран зургууддаа зориулж уг барилгыг бариулсан бөгөөд захилагч эзний нэрээр дэлхийд алдаршжээ. Ийн алдарших болсныг сэргэн мандалтын үеийн алдарт зураачдын бүтээлүүдтэй холбон тайлбарлах хүмүүс байдаг ч ихэнх хүмүүс гаднах барилгыг гоо сайхантай холбоотой хэмээн хүлээн зөвшөөрдөг. Барилгыг холоос харахад далайн эмгэн хумсын төрхийг санагдуулдаг. Үнэхээр ч эмгэн хумсын гадаад байдлаас барилгын санаа гарчээ.   Дотоод засал нь мушгиа ороомог хэлбэртэй дээш өгсөх маягаар зохицуулагдсан. Гэвч үзмэрийг үзэж байгаа хүмүүст дээш өгсөж байгаа мэт сэтгэгдэл төрүүлдэггүй бөгөөд үзмэрийг үзэн тойрч алхахад л дээд давхарт хүрсэн байдаг гэнэ. Мөн дотроо ямар ч шатгүй. Олон хүмүүс цугларахыг тооцоолж оройн хэлбэрийг уужим том хийж өгсөн нь орчин үеийн агааржуулалтын системээс дутахааргүй болжээ.