Нийслэл хотод жуулчдын сонирхолыг татдаг газруудын тоонд Монголын бурхан шашинтны төв Гандантэгчилэн хийд зүй ёсоор тооцогддог. Бидний соёл, уламжлалыг харуулсан түүхэн энэ газрын тохижилт муу бохир байгаад нийслэлийн Аялал жуулчлалын газар анхаарч тус хийдтэй хамтран өөрсдийн бололцоонд тулгуурлан тохижилтын ажлыг хийхээр болжээ. Уг ажлын эхлэл болгон өчигдөр нийслэлийн Аялал жуулчлалын газар, Монголын Үндэсний Их сургууль /МҮИС/-тай хамтран хийдийн дотор бүх нийтийн цэвэрлэгээ хийж, мод тарисан байна. Цэвэрлэгээнд МҮИС-ийн аялал жуулчлалын ангийн 250 гаруй оюутан оролцсон бөгөөд цаашид стандартын шаардлага хангасан тохилог бие засах газар ажиллуулах, хашаан дотор будаа зардаг, гэрэл зургийн үйлчилгээ үзүүлдэг иргэдийг нэгдсэн зохион байгуулалтад оруулах, гол үзмэрүүдийг тайлбаржуулах зэрэг арга хэмжээ зохион байгуулах гэнэ.
       Дашрамд дурдахад нийслэл хотын захиргаа, Эдийн засгийн хөгжлийн яамтай хамтран Гандангийн дэнжийг соёлын аялал жуулчлалын дүүрэг болгон хөгжүүлэх хэсэгчилсэн ерөнхий төлөвлөгөө боловсруулж байгаа юм байна.