Нийслэлийн орон сууцны иргэд хэрэглээний усаа хлормин ихтэй байгаа талаар гомдолдог. Харин УСУГ-аас өөрийн цахим хуудсаараа дамжуулан иргэдэд зөв ойлголт өгөх зорилгоор нэгэн мэдээллийг хүргэжээ. Энэ мэдээллийг илүү олон хэрэглэгчид хүргэх үүднээс сайтдаа байршуулж байна. Түүнчлэн тус газраас хэрэглээний усанд хлорыг холихдоо хэрэглэгчдийн эрүүл мэндэд сөрөг нөлөө үзүүлэхээргүй онол судалгааны үндэслэлтэйгээр хольдог тухай мэдэгдэж байсан юм.

 Хлор агуулсан химийн нэгдэл нь ундны усыг цэвэршүүлэх, ариутгахын үндсэн бодис болдог бөгөөд дэлхий дээрх ус цэвэрлэх систем бүхий байгууллагуудын 98% орчим нь хлорыг ариутгагч болгон хэрэглэж байна.
1908 онд Нью-Жерсид болсон анхдугаар зөвлөгөөний дараа АНУ ба Канадад усыг цэвэршүүлэх ариутгагчаар хлорыг хэрэглэх нь зүйтэй гэсэн шийдвэр гаргаснаар 200 сая Америк, Канадчууд өдөр тутамдаа хлоржуулж ариутгасан ундны усыг хэрэглэж эхэлжээ. Усыг цэвэршүүлэх хлоржуулалтын үр дүнг тогтоох зорилгоор хэд хэдэн судалгаа хийгдсэний үндсэн дээр энэ аргыг түгээмэл хэрэглэх болжээ.
1985 онд Харвардын Их сургууль дээр Ж.Каррел Моррисын удирдлагаар хлоржуулалтын үр дүнг Анагаах ухааны талаас үнэлэх судалгаа хийгдэж дүгнэлт гаргажээ. Үүнд:
Хлоржуулалтыг хэрэглэснээр ундны усанд байх бичил биетнээс шалтгаалах өвчлөлийн түвшин илэрхий буурсан.
Ундны усыг хлоржуулсанаар зарим бодисын исэлдэлт ба ургамлын задралаас үүсэх эвгүй үнэрийг арилгаж, усыг үнэргүй болгоно.
Хлоржуулалт нь замаг ба бактеруудыг устгах хүчтэй арга юм. Хлоржуулалтын үр дүнг ус дамжуулах ба хадгалах савны хананд өвөрмөц бичил биетэн ургаж, замагшилт үүссэн эсэхээр хянадаг.
Хлоржуулалт нь хүхэрт устөрөгчийг задалж, аммиак ба бусад азот агуулсан нэгдлүүдийг устгана.
Ийнхүү “Усыг ариутгахад том алхам болсон цорын ганц ашигтай арга бол хлоржуулалт юм” гэж дүгнэсэн бөгөөд энэхүү тасралтгүй үргэлжлэх халдваргүйжүүлэлт нь ундны ус хэрэглэгчид очих хүртлээ цэвэр аюулгүй байх эрүүл ахуйн баталгаа болно.